മലപ്പുറം: പാണക്കാട് മണ്ണിടിച്ചിലിനിടെ അപകടത്തിൽപ്പെട്ട മാധ്യമപ്രവർത്തകർക്കെതിരെ ഇൻസ്റ്റഗ്രാം വ്ളോഗറുടെ വിവാദ പരാമർശം. അപകടത്തിൽപ്പെട്ട മാധ്യമപ്രവർത്തകരെ മണ്ണിനടിയിൽ തന്നെ ഇട്ടുമൂടണമായിരുന്നുവെന്ന തരത്തിലുള്ള പ്രതികരണമാണ് വ്ളോഗർ നടത്തിയത്.
ഇൻസ്റ്റഗ്രാം വീഡിയോ സന്ദേശത്തിലൂടെയാണ് നിസാം എന്നയാൾ വിവാദ പരാമർശം നടത്തിയത്. അപകടസ്ഥലത്ത് മാധ്യമപ്രവർത്തകർ പകർത്തിയ ദൃശ്യങ്ങൾ പങ്കുവെച്ചുകൊണ്ടായിരുന്നു പ്രതികരണം. സംഭവത്തിൽ മാധ്യമപ്രവർത്തകർക്കെതിരെ സമൂഹമാധ്യമങ്ങളിൽ വിമർശനവും പ്രതിഷേധവും ഉയർന്നിട്ടുണ്ട്.
കഴിഞ്ഞ ദിവസമാണ് മലപ്പുറം പാണക്കാട് വേങ്ങര റോഡിലേക്ക് കുന്നിൻ ചെരുവിൽ നിന്ന് വൻതോതിൽ മണ്ണിടിഞ്ഞത്. ആളുകൾ ഇരുവശങ്ങളിലേക്ക് ഓടി മാറിയതിനാൽ വലിയ ദുരന്തം ഒഴിവായി. നിർമാണ പ്രവർത്തനങ്ങൾ നടന്നിരുന്ന ഭാഗത്തുനിന്നാണ് മണ്ണും കല്ലുകളും റോഡിലേക്ക് പതിച്ചത്.
സംഭവസമയത്ത് സ്ഥലത്തുണ്ടായിരുന്ന മലപ്പുറം കൈരളി ടിവി ക്യാമറാമാൻ ജയേഷിന് ഓടി രക്ഷപ്പെടുന്നതിനിടെ നിസാര പരിക്കേറ്റിരുന്നു.
അതേസമയം, മണ്ണിടിച്ചിലുണ്ടായ സ്ഥലത്തിന്റെ ഉടമയുമായി ബന്ധപ്പെട്ട് കൂടുതൽ ആരോപണങ്ങളും പുറത്തുവരുന്നുണ്ട്. പരപ്പനങ്ങാടി ചെട്ടിപ്പടി സ്വദേശി നൗഫൽ കടക്കാടന്റെ ഉടമസ്ഥതയിലുള്ള സ്ഥലത്ത് നിർമിക്കാൻ പദ്ധതിയിട്ടിരുന്നത് പ്രീമിയം ആയുർവേദ റിസോർട്ടാണെന്നാണ് പുറത്തുവരുന്ന വിവരം.
സ്ഥലവുമായി ബന്ധപ്പെട്ട ഇടപാടുകളിലും നിർമാണ അനുമതികളിലും കൂടുതൽ പരിശോധന വേണമെന്ന ആവശ്യവും ഉയർന്നിട്ടുണ്ട്. മണ്ണെടുക്കുന്നതിനും പാറ പൊട്ടിക്കുന്നതിനും അനുമതി നൽകിയതിൽ അധികൃതർക്ക് വീഴ്ച സംഭവിച്ചോയെന്നതും പരിശോധിക്കുകയാണ്.
നൗഫൽ നഗരസഭയ്ക്കും ജിയോളജി വകുപ്പിനും നൽകിയ വിലാസവുമായി ബന്ധപ്പെട്ടും വ്യക്തത തേടുന്നുണ്ട്. 2018-ൽ ഈ മേഖലയിൽ മണ്ണിടിച്ചിൽ ഉണ്ടായതിനെ തുടർന്ന് നിർമാണ പ്രവർത്തനങ്ങൾ നിർത്തിവയ്ക്കാൻ ഉത്തരവുണ്ടായിരുന്നുവെന്നും റിപ്പോർട്ടുകളുണ്ട്.
സ്ഥല ഇടപാടിൽ വേങ്ങര കുന്നുംപുറം സ്വദേശിയായ ക്വാറി ഉടമയ്ക്കും പങ്കുണ്ടെന്ന സൂചനകളും പുറത്തുവന്നിട്ടുണ്ട്. സംഭവവുമായി ബന്ധപ്പെട്ട എല്ലാ വശങ്ങളും പരിശോധിച്ചുവരികയാണ്.
