കേരള ശാസ്ത്രസാഹിത്യപരിഷത്ത് കുറ്റിപ്പുറം പഞ്ചായത്ത് കേന്ദ്രീകരിച്ച് തയാറാക്കിയ ജനകീയ വികസന പത്രികയുടെ പ്രകാശനം നാളെ വൈകീട്ട് 3 മണിക്ക് ഗ്രാമ പഞ്ചായത്ത് പ്രസിഡന്റ് നസീറ പറത്തൊടി നിർവഹിക്കും. ശാസ്ത്രസാഹിത്യ പരിഷത്തിന്റെ നേതൃത്വത്തിൽ സംസ്ഥാനത്ത് 150 ഓളം പഞ്ചായത്തുകളിൽ ജനകീയ വികസനപത്രിക തയാറാക്കുന്നുണ്ട്.ജില്ലയിൽ 12 ഓളം പഞ്ചായത്തുകളിലാണ് ജനകീയവികസന പത്രിക തയാറാക്കുന്നത്. ഇതിന്റെ ഭാഗമായി ജില്ലാ കമ്മിറ്റിയുടെ നേതൃത്വത്തിൽ വാഹനജാഥകൾ നടത്തും. കുറ്റിപ്പുറം മേഖലാ ജാഥയ്ക്ക് നവംബർ രണ്ടിന് രാവിലെ 11 മണിക്ക് കുറ്റിപ്പുറത്ത് സ്വീകരണം നൽകും. വികസനപത്രികയെ സംബന്ധിച്ച് മുഴുവൻ വാർഡുകളിലും ചർച്ചചെയ്യുമെന്നും ‘ജനകീയാസൂത്രണം പിന്നിട്ട വഴികൾ, മുന്നോട്ടുള്ള പാതകൾ’എന്ന വിഷയത്തിൽ ചർച്ചനടത്തുമെന്നും ഭാരവാഹികൾ വാർത്താസമ്മേളനത്തിൽ അറിയിച്ചു. ഹമീദ് കക്കട്ടിൽ,ബഷീർ പൂക്കോട്ട്,വി.രാജലക്ഷ്മി,എ.ഗീത എന്നിവർ സംബന്ധിച്ചു.
