മലയാള സിനിമകളെ കേരളത്തിന് പുറത്തുള്ള ഇന്ത്യൻ വിപണികളിലേക്ക് എത്തിക്കുക എന്ന ലക്ഷ്യത്തോടെ പ്രവർത്തിക്കുന്ന ഫ്യൂച്ചർ റണ്ണപ്പ് ഫിലിംസ് വിതരണരംഗത്ത് ശ്രദ്ധേയമായ മുന്നേറ്റം തുടരുന്നു. ‘ലോക: ചാപ്റ്റർ 1 – ചന്ദ്ര’, ‘കളങ്കാവൽ’ എന്നീ ചിത്രങ്ങൾക്ക് പിന്നാലെ ‘ബെത്ലഹേം കുടുംബ യൂണിറ്റ്’ കൂടി ഏറ്റെടുത്തതോടെ തുടർച്ചയായ വിജയങ്ങളിലൂടെ ഹാട്രിക് ബ്ലോക്ക്ബസ്റ്റർ നേട്ടമാണ് സ്ഥാപനം സ്വന്തമാക്കുന്നത്.
തമിഴ്നാട്ടിൽ മലയാള സിനിമകളുടെ വിതരണത്തിലൂടെ പ്രവർത്തനം ആരംഭിച്ച ഫ്യൂച്ചർ റണ്ണപ്പ് ഫിലിംസിന്റെ ആദ്യ ചിത്രം ടൊവിനോ തോമസ് നായകനായ ‘നരിവേട്ട’യായിരുന്നു. തുടർന്ന് ഷെയിൻ നിഗം നായകനായ ‘ബൽട്ടി’യിലൂടെ തമിഴ്നാട് വിപണിയിലെ സാന്നിധ്യം ശക്തമാക്കി. പിന്നീട് കേരളത്തിന് പുറത്തുള്ള കൂടുതൽ ഇന്ത്യൻ വിപണികളിലേക്ക് പ്രവർത്തനം വ്യാപിപ്പിക്കുകയായിരുന്നു.
നിർമാതാവും നടനുമായ അരുണ് നാരായൺ, നടനും സംവിധായകനുമായ ദിലീഷ് പോത്തൻ, ചെന്നൈ ആസ്ഥാനമായുള്ള വ്യവസായി അനൂപ് കുമാർ എന്നിവർ ചേർന്നാണ് ഫ്യൂച്ചർ റണ്ണപ്പ് ഫിലിംസിന് തുടക്കം കുറിച്ചത്. മലയാള സിനിമകൾക്ക് പുതിയ വിപണികൾ കണ്ടെത്തുകയും കേരളത്തിന് പുറത്തുള്ള പ്രേക്ഷകരിലേക്ക് മികച്ച ചിത്രങ്ങൾ എത്തിക്കുകയുമാണ് സ്ഥാപനത്തിന്റെ പ്രധാന ലക്ഷ്യം.
കഴിഞ്ഞ ഓണത്തിന് തിയേറ്ററുകളിലെത്തിയ ദുൽഖർ സൽമാൻ നിർമിച്ച ‘ലോക: ചാപ്റ്റർ 1 – ചന്ദ്ര’യും തുടർന്ന് മമ്മൂട്ടിയെ നായകനാക്കി ജിതിൻ കെ. ജോസ് സംവിധാനം ചെയ്ത ‘കളങ്കാവൽ’യും തമിഴ്നാട്ടിൽ ഫ്യൂച്ചർ റണ്ണപ്പ് ഫിലിംസാണ് വിതരണം ചെയ്തത്.
ഇതിന് പിന്നാലെയാണ് ഈ ഓണക്കാലത്ത് നിവിൻ പോളിയും മമിത ബൈജുവും പ്രധാന വേഷങ്ങളിലെത്തുന്ന ‘ബെത്ലഹേം കുടുംബ യൂണിറ്റ്’ വിതരണത്തിനെത്തിക്കുന്നത്. ഗിരീഷ് എ.ഡി സംവിധാനം ചെയ്യുന്ന ചിത്രത്തിന്റെ തമിഴ്, തെലുങ്ക് പതിപ്പുകൾ സെപ്റ്റംബർ 4ന് തിയേറ്ററുകളിലെത്തും. തമിഴ്നാട്, ആന്ധ്രാപ്രദേശ്, തെലങ്കാന മേഖലകളിലെ വിതരണച്ചുമതല ഫ്യൂച്ചർ റണ്ണപ്പ് ഫിലിംസിനാണ്.
തുടർച്ചയായ ചിത്രങ്ങളിലൂടെ കേരളത്തിന് പുറത്തുള്ള വിപണിയിൽ സാന്നിധ്യം ശക്തമാക്കുകയാണ് സ്ഥാപനം. മലയാള സിനിമകൾക്ക് ദേശീയതലത്തിൽ കൂടുതൽ വിപണി സാധ്യതകൾ തുറക്കുകയും വിവിധ സംസ്ഥാനങ്ങളിലെ പ്രേക്ഷകരിലേക്ക് മികച്ച മലയാള ചിത്രങ്ങളെ എത്തിക്കുകയും ചെയ്യുകയാണ് ഫ്യൂച്ചർ റണ്ണപ്പ് ഫിലിംസിന്റെ ലക്ഷ്യം.
