വയനാട് മെഡിക്കല് കോളേജില് വീണ്ടും ശസ്ത്രക്രിയയില് ഗുരുതര വീഴ്ചയുണ്ടായതായി ആരോപണം. ഹെര്ണിയ ശസ്ത്രക്രിയയിലെ പിഴവുമൂലം ആരോഗ്യവകുപ്പ് ജീവനക്കാരനായ യുവാവിന്റെ വൃഷണം നഷ്ടപ്പെട്ടതായാണ് പരാതി. ഡോക്ടര്ക്കെതിരെ മുഖ്യമന്ത്രിക്കും ജില്ലാ പൊലീസ് മേധാവിക്കും യുവാവ് പരാതി നല്കി.
സെപ്റ്റംബര് 13നാണ് യുവാവിനെ ശസ്ത്രക്രിയക്ക് വിധേയനാക്കിയത്. എടവക കുടുംബാരോഗ്യ കേന്ദ്രത്തില് സീനിയര് ക്ലര്ക്കായ തോണിച്ചാല് സ്വദേശി എന് എസ് ഗിരീഷാണ് ശസ്ത്രക്രിയയില് വൃഷണം നഷ്ടപ്പെട്ടതായി പരാതി നല്കിയത്.
സെപ്റ്റംബര് 13ന് മാനന്തവാടി മെഡിക്കല് കോളേജിലെ കണ്സല്ട്ടന്റ് ജനറല് സര്ജന് ഡോ. ജുബേഷ് അത്തിയോട്ടില് ആണ് ഹെര്ണിയ രോഗവുമായെത്തിയ ഗിരീഷിനെ ശസ്ത്രക്രിയ നടത്തിയത്. ശസ്ത്രക്രിയയില് വീഴ്ച പറ്റിയിട്ടും മൂന്നാം ദിവസം വാര്ഡിലെത്തിയ ഡോക്ടര് ഇത് മറച്ചുവെക്കുകയും തുടര്ന്ന് ഡിസ്ചാര്ജ് ചെയ്തതായും ഗിരീഷ് പറയുന്നു.
വേദന സഹിച്ച് ഏഴ് ദിവസം കഴിഞ്ഞപ്പോള് മുറിവിലെ തുന്നല് എടുക്കാന് എത്തിയപ്പോള് ഒ പിയിലുണ്ടായിരുന്ന ഡോക്ടര് നടത്തിയ പരിശോധനയില് സംശയം തോന്നിയാണ് സ്കാനിങ് നിര്ദേശിച്ചത്. റിപ്പോര്ട്ട് പരിശോധിച്ച സര്ജറി വിഭാഗത്തിലെ മറ്റൊരു ജൂനിയര് ഡോക്ടറാണ് വൃഷണത്തിന് ഗുരുതര പരിക്കുപറ്റിയ വിവരം ഗിരീഷിനെ അറിയിച്ചത്.
തുടര്ന്ന് സ്വകാര്യ മെഡിക്കല് കോളേജില് നടത്തിയ പരിശോധനയില് വൃഷണത്തിന്റെ പ്രവര്ത്തനം നിലച്ചത് കണ്ടെത്തി നീക്കം ചെയ്യുകയായിരുന്നുവെന്ന് ഗിരീഷ് പറയുന്നു. ആശുപത്രിയിലെ മറ്റുഡോക്ടര്മാരും നഴ്സ് ഉള്പ്പെടെയുള്ള ജീവനക്കാരും ചികിത്സാരേഖ തിരുത്തിയതായും ഗിരീഷ് പരാതിപ്പെട്ടു. പരാതി ലഭിച്ചതായും അന്വേഷിക്കുമെന്നും ജില്ലാ മെഡിക്കല് ഓഫീസര് ഡോ. പി ദിനീഷ് പറഞ്ഞു. രണ്ടു മാസം മുമ്പും ഇത്തരത്തില് ശസ്ത്രക്രിയയില് പിഴവ് സംഭവിച്ചത് വന് വിവാദമായിരുന്നു.
