ആള്‍ക്കൂട്ടത്തില്‍ ഒരാളായി മലയാള സിനിമയില്‍ എത്തി ഇന്ന് മോളിവുഡിന്റെ മുന്‍നിര നായകനായി മാറിയ ടോവിനോ തോമസ് തന്റെ അഭിനയ ജീവിതത്തിന്റെ പന്ത്രണ്ട് വര്‍ഷങ്ങള്‍ പൂര്‍ത്തിയാക്കുകയാണ്. ചെറുതും വലുതുമായ ഒട്ടനവധി കഥാപാത്രങ്ങള്‍ കാലങ്ങളായുള്ള അഭിനയ ജീവിതത്തില്‍ ടൊവിനോയുടേതായി പ്രേക്ഷകര്‍ക്ക് മുന്നിലെത്തി.
ഈ സന്തോഷ വിവരം ആരാധകരെ അറിയിച്ചിരിക്കുന്നത് ടൊവിനോ തന്നെയാണ്. ഈ പന്ത്രണ്ട് വര്‍ഷത്തില്‍ 50 സിനിമകള്‍ താന്‍ ചെയ്തുവെന്നും ഒപ്പം നിന്ന പ്രേക്ഷകര്‍ക്കും സഹപ്രവര്‍ത്തകര്‍ക്കും നന്ദി അറിയിക്കുന്നുവെന്നും ടൊവിനോ തോമസ് കുറിച്ചു. പ്രഭുവിന്റെ മക്കള്‍ മുതല്‍ അജയന്റെ രണ്ടാം മോഷണം വരെയുള്ള തന്റെ സിനിമാ യാത്രയുടെ ചെറു വിഡിയോയും ടൊവിനോ തോമസ് ഷെയര്‍ ചെയ്തിട്ടുണ്ട്.
’12 വര്‍ഷം, 50 സിനിമകള്‍… ഒപ്പം ഹൃദയം നിറഞ്ഞ നന്ദിയും. ഞാന്‍ ഭാഗമായിട്ടുള്ള എല്ലാ പ്രൊജക്റ്റുകളുടെയും സിനിമാ നിര്‍മ്മാതാക്കള്‍, നിര്‍മ്മാതാക്കള്‍, അഭിനേതാക്കള്‍, അണിയറ പ്രവര്‍ത്തകര്‍ തുടങ്ങി എല്ലാവരോടും നന്ദി പറയുകയാണ്. അവസാനമായി, നന്ദി പറയേണ്ടത് എന്റെ അവിശ്വസനീയമായ പ്രേക്ഷകരോടാണ്. നിങ്ങളുടെ സ്‌നേഹവും പിന്തുണയുമാണ് എനിക്ക് ഈ ലോകത്തെ അര്‍ത്ഥമാക്കിയത്. ഇന്ന് കാണുന്ന ഞാനായതും നിങ്ങള്‍ കാരണമാണ്’, എന്നാണ് ടൊവിനോ കുറിച്ചത്. പിന്നാലെ നിരവധി പേരാണ് താരത്തിന് ആശംസകളുമായി എത്തിയത്.
