കരിപ്പൂര്: കരിപ്പൂരില് മൂന്ന് വിമാനങ്ങള്ക്ക് ബോംബ് ഭീഷണി. രണ്ട് എയര് ഇന്ത്യാ എക്സ്പ്രസ് വിമാനത്തിനും ഇന്റിഗോ വിമാനത്തിനുമാണ് ഭീഷണി വന്നത്. ജിദ്ദയിലേക്കുള്ള IX 375, ദോഹയിലേക്കുള്ള IX 399 എന്നി എയര് ഇന്ത്യാ എക്സ്പ്രസ് വിമാനത്തിനും ദോഹയിലേക്കുള്ള ഇന്റിഗോ-6E87 വിമാനത്തിനുമാണ് ഭീഷണി. രാവിലെ 10 മണിയോടെ പറന്നു ഉയര്ന്ന വിമാനങ്ങള് ഇറങ്ങേണ്ട വിമാന താവളങ്ങളില് സുരക്ഷിതമായി ഇറങ്ങി.
വിമാന സര്വ്വീസുകളെ വ്യാജ ബോബ് ഭീഷണി സാരമായി ബാധിച്ചിട്ടുണ്ട്. രാജ്യത്ത് 6 എയര് ഇന്ത്യ വിമാനങ്ങള് ഉള്പ്പെടെ ഏഴ് വിമാനങ്ങള്ക്കാണ് ബോംബ് ഭീഷണി നേരിടേണ്ടി വന്നത്. നെടുമ്പാശ്ശേരി വിമാനത്താവളത്തിലും ഇന്നലെ ബോംബ് ഭീഷണിയുണ്ടായിരുന്നു. രണ്ട് വിമാനങ്ങള്ക്കാണ് ബോംബ് ഭീഷണിയുണ്ടായത്. എയര് ഇന്ത്യയുടെ കൊച്ചി- ദമാം, ആകാശ എയറിന്റെ കൊച്ചി- മുംബൈ വിമാനങ്ങള്ക്കാണ് ഭീഷണി സന്ദേശം എത്തിയത്. എക്സിലൂടെയാണ് ഭീഷണി സന്ദേശം ഉണ്ടായത്.
ഇന്ന് മാത്രം രാജ്യത്ത് ഇന്ഡിഗോ, എയര് ഇന്ത്യ, വിസ്താര, ആകാശ എയര് തുടങ്ങിയ കമ്പനികളുടെ 32 വിമാനങ്ങള്ക്കാണ് ബോംബ് ഭീഷണിയുണ്ടായത്.
100ലധികം ബോംബ് ഭീഷണികളാണ് കഴിഞ്ഞ അഞ്ച് ദിവസത്തിനിടെ വിമാനങ്ങള്ക്ക് ലഭിച്ചത്. കഴിഞ്ഞ ഒരാഴ്ചയായി തുടരുന്ന വ്യാജ ബോംബ് ഭീഷണികള് യാത്രക്കാരെയും ജീവനക്കാരേയും ഒരുപോലെ കുഴപ്പിക്കുകയാണ്. കഴിഞ്ഞ തിങ്കളാഴ്ച മുതല്, കുറഞ്ഞത് 35 വിമാനങ്ങള്ക്കെങ്കിലും ഇത്തരത്തില് വ്യാജ ഭീഷണികള് ലഭിച്ചിട്ടുണ്ട്. അതേസമയം ബോംബ് ഭീഷണികള്ക്ക് പിന്നിലുള്ളവര്ക്കെതിരെ നടപടി സ്വീകരിക്കാന് കേന്ദ്ര വ്യോമയാന മന്ത്രാലയം ആവശ്യപ്പെട്ടു. ഇത്തരം സംഭവങ്ങളിലെ പ്രാഥമിക അന്വേഷണത്തില് ഗൂഢാലോചന സംശയിക്കുന്നില്ലെന്നും ‘ഭീഷണികള്ക്ക്’ പിന്നില് ഭൂരിഭാഗവും പ്രായപൂര്ത്തിയാവാത്തവരും തമാശയ്ക്ക് ചെയ്യുന്നവരും ആണെന്ന് കേന്ദ്ര വ്യോമയാന മന്ത്രി പറഞ്ഞു.
