തിരുവന്തപുരം: കെഎസ്ആര്ടിസിയിലെ തൊഴിലാളി സംഘടനയായ ടിഡിഎഫ് ഒന്നാം തീയതി മുതല് പ്രഖ്യാപിച്ച സമരത്തെ ശക്തമായി നേരിടുമെന്ന് മാനേജ്മെന്റ്. സമരത്തില് പങ്കെടുക്കുന്ന ജീവനക്കാര്ക്ക് ഡയസ്നോന് ബാധകമാക്കുമെന്നും സെപ്തംബര് മാസത്തെ ശമ്പളം നല്കില്ലെന്നും മാനേജ്മെന്റ് മുന്നറിയിപ്പ് നല്കി.
മോട്ടോര് ആക്ട് വര്ക്കേഴ്സ് 1961 നും അതിന്റെ അനുബന്ധ റൂളും അനുസരിച്ചുള്ള പുതിയ ഡ്യൂട്ടി സമ്പ്രദായത്തിലുള്ള ഷെഡ്യൂളുകള് ഇതിനകം പ്രസിദ്ധീകരിച്ചിട്ടുണ്ട്. ഇത് ഒന്നാം തീയതി മുതല് തന്നെ നടപ്പാക്കും. ജീവനക്കാരുടെ ആയാസം കുറയ്ക്കുന്ന ഈ സമ്പ്രദായം ബഹുഭൂരിപക്ഷം ജീവനക്കാരും പിന്തുണ നല്കുമ്പോള് ഒരു ന്യൂന പക്ഷം ജീവനക്കാര് കാണിക്കുന്ന പഴയ സമര മുറ നഷ്ടത്തില് ഓടുന്ന ഈ സ്ഥാപനത്തിന് ഇനിയും താങ്ങാന് കഴിയില്ലെന്നും മാനേജ്മെന്റ് പ്രസ്താവനയില് പറയുന്നു.