അര്‍ധബോധാവസ്ഥയില്‍ ലൈംഗിക ബന്ധത്തിന് നല്‍കുന്ന സമ്മതം അനുമതിയായി കണക്കാക്കാനാവില്ലെന്ന് ഹൈക്കോടതി. പട്ടികജാതി വിഭാഗത്തില്‍പ്പെട്ട വിദ്യാര്‍ത്ഥിനിയെ ലഹരി പാനീയം നല്‍കി പീഡിപ്പിച്ച കേസില്‍ പ്രതിയായ വിദ്യാര്‍ത്ഥിക്ക് എസ്‌സി, എസ്ടി സ്‌പെഷ്യല്‍ കോടതി ജാമ്യം നിഷേധിച്ചത് ശരിവച്ചുകൊണ്ടായിരുന്നു ഹൈക്കോടതിയുടെ നിരീക്ഷണം.
ജസ്റ്റിസ് എ ബദറുദ്ദീന്‍ ആണ് ഇക്കാര്യം വ്യക്തമാക്കിയത്. പ്രതി നല്‍കിയ പാനീയം കുടിച്ച പെണ്‍കുട്ടി അര്‍ധബോധാവസ്ഥയിലായതിനാല്‍ ബോധപൂര്‍വം അനുമതി നല്‍കിയതായി കരുതാനാവില്ല. പ്രഥമദൃഷ്ട്യാ പ്രോസിക്യൂഷന്‍ കേസില്‍ കഴമ്പുണ്ടെന്നു വിലയിരുത്തിയ കോടതി മുന്‍കൂര്‍ ജാമ്യാപേക്ഷ തള്ളിയ കീഴ്‌ക്കോടതി നടപടിയില്‍ തെറ്റില്ലെന്നും വ്യക്തമാക്കി.
2022 നവംബര്‍ 18ന് ആണ് കേസിനാസ്പദമായ സംഭവം. പ്രതി ലൈബ്രറിയിലേക്ക് വിളിച്ചു വരുത്തി കേക്കും വെളളവും നല്‍കി. ഈ സമയത്ത് പ്രതി കൂട്ടുകാര്‍ക്കൊപ്പം മദ്യപിക്കുകയും പുകവലിക്കുകയും ചെയ്തിരുന്നു. പാനീയവും കേക്കും കഴിച്ചതോടെ തന്റെ കാഴ്ച മങ്ങി എന്നുമാണ് യുവതിയുടെ മൊഴി.
അര്‍ധബോധാവസ്ഥയിലായ വിദ്യാര്‍ത്ഥിനിയെ കോളേജിന്റെ മുകള്‍ നിലയിലെത്തിച്ചു പീഡിപ്പിച്ചുവെന്നാണ് കേസ്. ഭീഷണിപ്പെടുത്തി പിന്നീടും പീഡിപ്പിച്ചതായും ആരോപണമുണ്ട്. അതേസമയം കോളേജ് പഠനകാലത്ത് തങ്ങള്‍ പ്രണയത്തിലായിരുന്നുവെന്നും പിന്നീട് ബന്ധം വഷളായപ്പോള്‍ കളളക്കേസ് ചമച്ചതാണെന്നും പ്രതി മുന്‍കൂര്‍ ജാമ്യാപേക്ഷയില്‍ വാദിച്ചിരുന്നു.
