യുഎഇ: ഫ്ലൈദുബായ് വിമാനം ഇസ്രയേൽ വ്യോമാതിർത്തിയിൽ പ്രവേശിച്ചിരുന്നെങ്കിൽ വെടിവെച്ചിടാൻ ഇസ്രയേൽ യുദ്ധവിമാനങ്ങൾ സജ്ജമായിരുന്നുവെന്ന് അമേരിക്കൻ മാധ്യമമായ സി.ബി.എസ് ന്യൂസ് റിപ്പോർട്ട്. വിമാനം ഇസ്രയേൽ വ്യോമാതിർത്തി കടന്നാൽ ആക്രമിക്കാനായിരുന്നു നീക്കമെന്നും റിപ്പോർട്ടിൽ പറയുന്നു.
ഫ്ലൈദുബായ് വിമാനത്തിലെ പൈലറ്റുമാരുമായി ഇസ്രയേൽ വ്യോമസേന ആശയവിനിമയത്തിന് ശ്രമിച്ചെങ്കിലും മറുപടി ലഭിച്ചില്ലെന്നും സി.ബി.എസ് ന്യൂസ് റിപ്പോർട്ട് ചെയ്തു. വിമാനത്തിലുണ്ടായിരുന്ന 182 യാത്രക്കാരിൽ 150 പേർ ഇസ്രയേൽ പൗരന്മാരായിരുന്നു.
ഇസ്രയേലികളെ ബന്ദികളാക്കുന്ന സാഹചര്യം ഒഴിവാക്കുന്നതിനായാണ് വിമാനം വെടിവെച്ചിടാനുള്ള നീക്കം നടത്തിയതെന്നാണ് റിപ്പോർട്ടിലെ വിശദീകരണം.
അതേസമയം, വിമാനത്തിലെ സഹപൈലറ്റായ ഒമാൻ സ്വദേശി ഹമാം അൽ ഹമാമി ക്യാപ്റ്റൻ സ്മിത് മച്ചാറിനെ കോക്ക്പിറ്റിൽ ആക്രമിച്ച സംഭവവും റിപ്പോർട്ടിൽ പരാമർശിക്കുന്നുണ്ട്. ടെൽ അവീവിലെ അന്താരാഷ്ട്ര വിമാനത്താവളമായിരുന്നു ലക്ഷ്യമിട്ടതെന്ന റിപ്പോർട്ടുകളും നേരത്തെ പുറത്തുവന്നിരുന്നു.
യുഎഇയിൽ ജനിച്ച ഹമാം അൽ ഹമാമി ഒമാൻ എയറിൽ ഏഴ് വർഷത്തോളം ജോലി ചെയ്തിരുന്നു. തീവ്രവാദ നിലപാടുകളുമായി ബന്ധപ്പെട്ട ആശങ്കകളെ തുടർന്ന് പൈലറ്റ് പരിശീലനത്തിൽ നിന്ന് മാറ്റി മറ്റ് ചുമതലകൾ നൽകിയിരുന്നതായും റിപ്പോർട്ടിൽ പറയുന്നു. 2025 ഫെബ്രുവരിയിൽ ഒമാൻ എയർ വിട്ട ഇയാൾ പിന്നീട് റോയൽ എയർ മാറോക്കിലും തുടർന്ന് ഫ്ലൈദുബായിലും ജോലി ചെയ്തതായി റിപ്പോർട്ടുണ്ട്.
ആക്രമണത്തിന് പിന്നാലെ ഇയാളുടെ സാമൂഹികമാധ്യമ അക്കൗണ്ടുകളിൽ പ്രത്യക്ഷപ്പെട്ട ചില പോസ്റ്റുകളും അന്വേഷണത്തിന്റെ ഭാഗമായതായി റിപ്പോർട്ടിൽ പറയുന്നു. ബോയിംഗ് 737 മാക്സ് വിമാനത്തിന്റെ കോക്പിറ്റിൽ നിന്നുള്ള ദൃശ്യങ്ങൾ, ഇസ്രയേലി വിമാനക്കമ്പനികളുടെ വിമാനങ്ങൾ, അൽഖ്വയ്ദ മുൻ നേതാവ് അയ്മൻ അൽ സവാഹിരിയുടെയും മറ്റൊരു തീവ്രവാദിയുടെയും ചിത്രങ്ങൾ എന്നിവ ഉൾപ്പെട്ട ദൃശ്യങ്ങൾ അതിലുണ്ടായിരുന്നുവെന്നാണ് റിപ്പോർട്ട്.
എന്നാൽ, സാമൂഹികമാധ്യമ പോസ്റ്റുകളും മറ്റ് വിവരങ്ങളും സംബന്ധിച്ച റിപ്പോർട്ടിലെ അവകാശവാദങ്ങൾ അന്വേഷണത്തിലൂടെ സ്ഥിരീകരിക്കേണ്ടതുണ്ട്. ആക്രമണത്തിന്റെയും വിമാനത്തെ വെടിവെച്ചിടാനുള്ള ഇസ്രയേലിന്റെ നീക്കത്തിന്റെയും കൂടുതൽ വിശദാംശങ്ങൾ പുറത്തുവരുന്നതേയുള്ളൂ.
