ചെന്നൈ: തിരഞ്ഞെടുപ്പ് പ്രചാരണത്തിൽ കുട്ടിയെ പങ്കെടുപ്പിച്ചെന്ന ആരോപണത്തിൽ തമിഴ്നാട് പ്രതിപക്ഷ നേതാവ് ഉദയനിധി സ്റ്റാലിനെതിരെ കേസ്. ധാരാപുരം പൊലീസ് എഫ്ഐആർ രജിസ്റ്റർ ചെയ്തു.
ഉപതിരഞ്ഞെടുപ്പിന്റെ ഭാഗമായി ധാരാപുരത്ത് നടന്ന പൊതുയോഗത്തിൽ കുട്ടിയെ പങ്കെടുപ്പിച്ചത് തിരഞ്ഞെടുപ്പ് പെരുമാറ്റച്ചട്ടങ്ങളുടെ ലംഘനമാണെന്ന ആരോപണത്തെ തുടർന്നാണ് നടപടി.
തിരുപ്പൂർ ജില്ലാ പൊലീസിന്റെ വാർത്താക്കുറിപ്പ് പ്രകാരം, ശനിയാഴ്ച ധാരാപുരത്തെ പെരിയാർ പ്രതിമയ്ക്ക് സമീപം ഉദയനിധി പങ്കെടുത്ത പൊതുയോഗത്തിലാണ് സംഭവം.
തിരഞ്ഞെടുപ്പ് പ്രചാരണ പ്രവർത്തനങ്ങളിൽ കുട്ടികളെ ഉപയോഗിക്കരുതെന്ന് തിരഞ്ഞെടുപ്പ് കമ്മീഷൻ നിർദേശിച്ചിട്ടുണ്ട്.
യോഗത്തിനിടെ ഉദയനിധി ഒരു കുട്ടിയെക്കൊണ്ട് സംസാരിപ്പിച്ചതായും, മുഖ്യമന്ത്രിക്കെതിരെ അധിക്ഷേപകരമായ പരാമർശങ്ങൾ നടത്തിച്ചതായും ആരോപണമുണ്ട്. കുട്ടിയെക്കൊണ്ട് മുദ്രാവാക്യം വിളിപ്പിച്ചെന്നും ആരോപണമുണ്ട്. ഇതുമായി ബന്ധപ്പെട്ട വീഡിയോ ദൃശ്യങ്ങളും പുറത്തുവന്നിരുന്നു.
സംഭവത്തിൽ അന്വേഷണം തുടരുകയാണെന്ന് പൊലീസ് അറിയിച്ചു.
അതേസമയം, കുട്ടിയുടെ പേരോ പ്രായമോ സംബന്ധിച്ച വിവരങ്ങൾ പൊലീസ് പുറത്തുവിട്ടിട്ടില്ല. കേസ് രജിസ്റ്റർ ചെയ്തതായി സ്ഥിരീകരിച്ചെങ്കിലും, ആരുടെ പരാതിയുടെ അടിസ്ഥാനത്തിലാണ് നടപടിയെടുത്തതെന്ന് പൊലീസ് വ്യക്തമാക്കിയിട്ടില്ല.
