നിവിൻ പോളി നായകനായെത്തിയ ‘ബെത്ലഹേം കുടുംബ യൂണിറ്റ്’ ഒടിടിയിലേക്ക്. ജിയോ ഹോട്ട്സ്റ്റാറിൽ ഒക്ടോബർ രണ്ടിനാണ് ചിത്രം സ്ട്രീമിങ് ആരംഭിക്കുക. തിയേറ്ററുകളിൽ മികച്ച വിജയം നേടിയ ചിത്രത്തിന്റെ ഒടിടി റിലീസിനായി ആരാധകർ കാത്തിരിക്കുകയാണ്.
കേരള ബോക്സ്ഓഫിസിൽ ശ്രദ്ധേയ നേട്ടങ്ങൾ സ്വന്തമാക്കിയ ചിത്രത്തിന് തമിഴ്നാട്ടിലും ആന്ധ്ര-തെലങ്കാനയിലും ജിസിസി രാജ്യങ്ങളിലും മികച്ച പ്രതികരണമാണ് ലഭിച്ചത്. മലയാള സിനിമയിൽ അതിവേഗം 300 കോടി ക്ലബിലെത്തിയ ചിത്രമെന്ന നേട്ടവും ‘ബെത്ലഹേം കുടുംബ യൂണിറ്റ്’ സ്വന്തമാക്കിയതായി അണിയറപ്രവർത്തകർ അവകാശപ്പെടുന്നു.
‘പ്രേമലു’വിന് ശേഷം ഗിരീഷ് എ.ഡിയും ഭാവന സ്റ്റുഡിയോസും വീണ്ടും ഒന്നിച്ച ചിത്രമാണിത്. നിവിൻ പോളിയുടെ ജസ്റ്റിൻ എന്ന കഥാപാത്രവും മമിത ബൈജുവിന്റെ ആഷ്ലി എന്ന കഥാപാത്രവും തമ്മിലുള്ള കെമിസ്ട്രി ചിത്രത്തിന്റെ പ്രധാന ആകർഷണങ്ങളിലൊന്നായി മാറി.
ഫഹദ് ഫാസിൽ, ദിലീഷ് പോത്തൻ, ശ്യാം പുഷ്കരൻ എന്നിവർ ചേർന്നാണ് ചിത്രം നിർമിച്ചത്. സംഗീത് പ്രതാപ്, സുരേഷ് കൃഷ്ണ, ബിന്ദു പണിക്കർ, വിനയ് ഫോർട്ട്, റോഷൻ ഷാനവാസ്, ശ്യാം മോഹൻ, ഷമീർ ഖാൻ, ശ്രിന്ദ, പാർവതി അയ്യപ്പദാസ്, മീനാക്ഷി രവീന്ദ്രൻ എന്നിവരും ചിത്രത്തിൽ ശ്രദ്ധേയ വേഷങ്ങളിലെത്തുന്നു.
വിഷ്ണു വിജയന്റെ സംഗീതവും അജ്മൽ സാബുവിന്റെ ഛായാഗ്രഹണവും ആകാശ് ജോസഫ് വർഗീസിന്റെ എഡിറ്റിംഗും ചിത്രത്തിന്റെ സാങ്കേതിക മികവിന് കരുത്തേകി. തിയേറ്ററുകളിൽ റീവാച്ചിനായി പ്രേക്ഷകർ എത്തുന്നതിനിടെയാണ് ഒടിടി റിലീസ് പ്രഖ്യാപിച്ചിരിക്കുന്നത്.
ഒക്ടോബർ രണ്ടിന് ജിയോ ഹോട്ട്സ്റ്റാറിലെത്തുന്ന ‘ബെത്ലഹേം കുടുംബ യൂണിറ്റ്’ ഒടിടിയിലും പുതിയ നേട്ടങ്ങൾ സ്വന്തമാക്കുമെന്ന പ്രതീക്ഷയിലാണ് അണിയറപ്രവർത്തകരും ആരാധകരും.
