യുക്രെയ്ൻ തലസ്ഥാനമായ കീവിൽ റഷ്യൻ ആക്രമണം.
ഡിനിപ്രോ നദിക്ക് കുറുകെയുള്ള നോർത്തേൺ ബ്രിഡ്ജിന് നേരെയാണ് ആക്രമണമുണ്ടായത്. പാലത്തിലെ ഓവർഹെഡ് വൈദ്യുതി ലൈനുകൾക്ക് കേടുപാടുകൾ സംഭവിച്ചതായി റിപ്പോർട്ട്.
ഇന്ന് പുലർച്ചെയായിരുന്നു ആക്രമണം.
കീവിലെ കിഴക്കൻ, പടിഞ്ഞാറൻ തീരങ്ങളെ ബന്ധിപ്പിക്കുന്ന പ്രധാന പാതകളിലൊന്നാണ് നോർത്തേൺ ബ്രിഡ്ജ്. പാലത്തിന് കേടുപാടുകൾ സംഭവിച്ചതോടെ കിഴക്കൻ തീരത്തുനിന്ന് പടിഞ്ഞാറൻ തീരത്തേക്കുള്ള പാലം വഴിയുള്ള ഗതാഗതം നിർത്തിവെച്ചു.
കഴിഞ്ഞ വ്യാഴാഴ്ച കീവിലെ ഇരുഭാഗങ്ങളെയും ബന്ധിപ്പിക്കുന്ന സതേൺ ബ്രിഡ്ജിന് നേരെയും ആക്രമണമുണ്ടായിരുന്നു.
യുക്രെയ്ൻ റഷ്യയുടെ ഊർജ സംവിധാനങ്ങൾക്ക് നേരെ നടത്തിയ ആക്രമണങ്ങൾക്ക് മറുപടിയായാണ് കീവിലെ ആക്രമണമെന്നാണ് റഷ്യൻ പ്രസിഡന്റ് വ്ലാദിമിർ പുടിന്റെ വിശദീകരണം.
നോർത്തേൺ ബ്രിഡ്ജിന് നേരെയുണ്ടായ ആക്രമണത്തിൽ നിലവിൽ ആളപായമൊന്നും റിപ്പോർട്ട് ചെയ്തിട്ടില്ല.
