മലപ്പുറം: നിലമ്പൂരിൽ ഓടിക്കൊണ്ടിരുന്ന ബൈക്കിന് തീപിടിച്ച് അപകടം. ഇന്ന് ഉച്ചയോടെയാണ് സംഭവം. ബൈക്കിലുണ്ടായിരുന്ന യാത്രക്കാരൻ സമയോചിതമായി വാഹനം നിർത്തി പുറത്തിറങ്ങിയതിനാൽ വൻ ദുരന്തം ഒഴിവായി.
യാത്രയ്ക്കിടെ ബൈക്കിന്റെ എഞ്ചിൻ ഭാഗത്തുനിന്നാണ് ആദ്യം പുക ഉയർന്നത്. പുക ശ്രദ്ധയിൽപ്പെട്ട യാത്രക്കാരൻ ഉടൻ വാഹനം റോഡരികിലേക്ക് മാറ്റിനിർത്തി സുരക്ഷിതമായി പുറത്തിറങ്ങി. പിന്നാലെ തീ ശക്തമായി പടർന്ന് ബൈക്ക് പൂർണമായും കത്തിനശിച്ചു.
അപകടത്തിൽ യാത്രക്കാരന് സാരമായ പരുക്കുകളില്ല. തീപിടിത്തത്തിന്റെ കാരണം വ്യക്തമായിട്ടില്ല. സാങ്കേതിക തകരാറാണോ മറ്റ് കാരണങ്ങളാണോ തീപിടിത്തത്തിന് പിന്നിലെന്ന് പരിശോധിച്ചുവരികയാണ്.
യാത്രയ്ക്കിടെ വാഹനത്തിൽ നിന്ന് അസാധാരണമായ പുകയോ അമിത ചൂടോ ശ്രദ്ധയിൽപ്പെട്ടാൽ ഉടൻ വാഹനം നിർത്തി സുരക്ഷിതമായ അകലത്തിലേക്ക് മാറണമെന്ന മുന്നറിയിപ്പും അധികൃതർ നൽകി.
