നിലവിലെ ചാമ്പ്യൻമാരായ അർജന്റീന ഫിഫ ലോകകപ്പിന്റെ പ്രീക്വാർട്ടറിലേക്ക്. മയാമിയിൽ നടന്ന ആവേശപ്പോരിൽ കേപ് വെർദെയെ അധികസമയത്ത് 3–2ന് മറികടന്നാണ് ലയണൽ മെസിയും സംഘവും അവസാന പതിനാറിലേക്ക് മുന്നേറിയത്.
ടൂർണമെന്റിലെ അട്ടിമറികളിലൂടെ ശ്രദ്ധേയരായ കേപ് വെർദെ അർജന്റീനയ്ക്ക് ശക്തമായ വെല്ലുവിളിയാണ് ഉയർത്തിയത്. മത്സരത്തിന്റെ 29-ാം മിനിറ്റിൽ ലയണൽ മെസി നേടിയ ഗോളിലൂടെ അർജന്റീന ലീഡ് നേടി. ലോകകപ്പ് ചരിത്രത്തിൽ മെസിയുടെ ഇരുപതാമത്തെ ഗോളായിരുന്നു ഇത്. രണ്ടാം പകുതിയിൽ ഡെറോയ് ഡുവാർട്ടെ സമനില പിടിച്ചതോടെ മത്സരം അധികസമയത്തിലേക്ക് നീങ്ങി.
അധികസമയത്തിന്റെ തുടക്കത്തിൽ ലിസാൻഡ്രോ മാർട്ടിനെസ് അർജന്റീനയെ വീണ്ടും മുന്നിലെത്തിച്ചെങ്കിലും, സിഡ്നി ലോപസ് കബ്രാലിന്റെ മനോഹര ഗോളിലൂടെ കേപ് വെർദെ വീണ്ടും സമനില നേടി. ഒടുവിൽ 111-ാം മിനിറ്റിൽ ലയണൽ മെസിയുടെ കോർണറിൽ നിന്ന് ക്രിസ്റ്റ്യൻ റൊമേറോയുടെ ഹെഡർ കേപ് വെർദെ താരം ഡിനി ബോർഗസിൽ തട്ടി സെൽഫ് ഗോളായതോടെ അർജന്റീന വിജയം ഉറപ്പിച്ചു.
ആദ്യമായി ലോകകപ്പിന്റെ നോക്കൗട്ട് ഘട്ടത്തിലെത്തിയ കേപ് വെർദെ തോറ്റെങ്കിലും പോരാട്ടവീര്യം കൊണ്ട് ശ്രദ്ധ നേടി. മത്സരത്തിന്റെ നിർണായക ഘട്ടങ്ങളിൽ അർജന്റീനൻ ഗോൾകീപ്പർ എമിലിയാനോ മാർട്ടിനെസിന്റെ നിർണായക സേവുകളും ടീമിന്റെ വിജയത്തിൽ നിർണായകമായി. പ്രീക്വാർട്ടറിൽ അർജന്റീന ഈജിപ്തിനെ നേരിടും.
