തിയേറ്ററുകളിൽ മികച്ച പ്രതികരണം നേടിയ ‘മോളിവുഡ് ടൈംസ്’ ഇനി ഒ.ടി.ടി. പ്രേക്ഷകർക്കും. യുവതാരം നസ്ലൻ കേന്ദ്രകഥാപാത്രത്തെ അവതരിപ്പിച്ച ചിത്രം ജിയോഹോട്സ്റ്റാറിലൂടെ സ്ട്രീമിങ് ആരംഭിച്ചതിന് പിന്നാലെ മികച്ച പ്രതികരണമാണ് ലഭിക്കുന്നത്.
അഭിനവ് സുന്ദർ നായക് സംവിധാനം ചെയ്ത ചിത്രം ജൂൺ അഞ്ചിനാണ് തിയേറ്ററുകളിൽ റിലീസ് ചെയ്തത്. നസ്ലന്റെ പ്രകടനത്തിനും സംവിധായകന്റെ അവതരണശൈലിക്കും മികച്ച അഭിപ്രായങ്ങളാണ് സാമൂഹിക മാധ്യമങ്ങളിൽ ഉയരുന്നത്. റിലേറ്റ് ചെയ്യാൻ കഴിയുന്ന രംഗങ്ങളും ശക്തമായ തിരക്കഥയുമാണ് ചിത്രത്തിന്റെ പ്രധാന ആകർഷണമെന്നാണ് പ്രേക്ഷകരുടെ വിലയിരുത്തൽ. ജേക്സ് ബിജോയ് ഒരുക്കിയ പശ്ചാത്തല സംഗീതത്തിനും മികച്ച പ്രശംസ ലഭിക്കുന്നുണ്ട്.
നസ്ലനൊപ്പം സംഗീത് പ്രതാപ്, ഷറഫുദ്ദീൻ, റോഷൻ ഷാനവാസ്, ജഗദീഷ്, അപ്പുണ്ണി ശശി, പ്രശാന്ത് അലക്സാണ്ടർ, ബാലചന്ദ്രൻ ചുള്ളിക്കാട്, അൽത്താഫ് സലീം, ഗോപിക രമേശ്, രാജേഷ് മാധവൻ എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. രണ്ട് പ്രമുഖ താരങ്ങൾ അതിഥി വേഷത്തിലും ചിത്രത്തിലെത്തുന്നുണ്ട്.
ആഷിക് ഉസ്മാൻ പ്രൊഡക്ഷൻസിന്റെ ബാനറിൽ ആഷിക് ഉസ്മാൻ നിർമ്മിച്ച ചിത്രത്തിന്റെ തിരക്കഥ രാമു സുനിലാണ് ഒരുക്കിയിരിക്കുന്നത്. വിശ്വജിത്ത് ഒടുക്കത്തിൽ ഛായാഗ്രഹണവും ജേക്സ് ബിജോയ് സംഗീതവും നിർവഹിച്ച ചിത്രത്തിന്റെ എഡിറ്റിങ് നിധിൻ രാജ് അറോളും സംവിധായകനും ചേർന്നാണ് നിർവഹിച്ചിരിക്കുന്നത്.
