തൃശൂർ കടവല്ലൂരിൽ ബൈക്കും ടൂറിസ്റ്റ് ബസും കൂട്ടിയിടിച്ച് കൊച്ചി വിമാനത്താവളത്തിലെ ജീവനക്കാരനായ യുവാവ് മരിച്ചു. കുറ്റിപ്പുറം പഴവൂർ ചക്കുവളപ്പിൽ സുധീറിന്റെ മകൻ സി.വി. ജിതിൻ (22) ആണ് മരിച്ചത്. ഞായറാഴ്ച രാത്രി 7.20 ഓടെ പെരുമ്പിലാവ്–കുറ്റിപ്പുറം സംസ്ഥാനപാതയിൽ കടവല്ലൂർ അമ്പലം സ്റ്റോപ്പിന് സമീപമായിരുന്നു അപകടം.
കുന്നംകുളം ഭാഗത്തുനിന്ന് കുറ്റിപ്പുറത്തേക്ക് പോവുകയായിരുന്ന ടൂറിസ്റ്റ് ബസുമായി, മറ്റൊരു വാഹനത്തെ മറികടന്നെത്തിയ ബുള്ളറ്റ് ബൈക്ക് കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ ജിതിൻ സംഭവസ്ഥലത്തുതന്നെ മരിച്ചു.
അപകടത്തിൽ ബൈക്കിനും ടൂറിസ്റ്റ് ബസിനും കാര്യമായ കേടുപാടുകൾ സംഭവിച്ചു. അപകടത്തെത്തുടർന്ന് മേഖലയിൽ ഗതാഗതം ഭാഗികമായി തടസ്സപ്പെട്ടു. കുന്നംകുളം പൊലീസ് സ്ഥലത്തെത്തി തുടർനടപടികൾ സ്വീകരിച്ചു. മൃതദേഹം പെരുമ്പിലാവിലെ സ്വകാര്യ ആശുപത്രിയിൽ സൂക്ഷിച്ചിരിക്കുകയാണ്.
കൊച്ചി വിമാനത്താവളത്തിലെ ജീവനക്കാരനായ ജിതിൻ വിമാനത്താവളത്തിലേക്ക് പോകുന്നതിനിടെയാണ് അപകടത്തിൽപ്പെട്ടത്. നിഷയാണ് മാതാവ്. അഭിനവ്, അഭിനന്ദ് എന്നിവർ സഹോദരങ്ങളാണ്.
