അമൽ നീരദിന്റെ ഏറ്റവും പുതിയ ചിത്രം ‘ബാച്ച്‌ലർ പാർട്ടി Deux’ൽ ടൊവിനോ തോമസിന്റെ പോസ്റ്റർ പുറത്തിറങ്ങി. ഷേക്സ്പിയറിന്റെ പ്രശസ്തമായ ‘നരകം ശൂന്യമാണ്, എല്ലാ പിശാചുക്കളും ഇവിടെയുണ്ട്’ എന്ന വരികൾക്കൊപ്പമാണ് ടൊവിനോയുടെ സ്റ്റൈലിഷ് പോസ്റ്റർ പുറത്തുവിട്ടത്. നവംബർ 19നാണ് ചിത്രത്തിന്റെ വേൾഡ് വൈഡ് റിലീസ്.
2012ൽ പുറത്തിറങ്ങി തരംഗമായ ‘ബാച്ച്‌ലർ പാർട്ടി’യുടെ രണ്ടാം ഭാഗം 14 വർഷങ്ങൾക്ക് ശേഷമാണ് എത്തുന്നത്. പഴയ ചിത്രത്തിന്റെ കൾട്ട് ക്ലാസിക് പദവിയും പുതിയ തലമുറയുടെ സ്റ്റൈലിഷ് അവതരണവും ചേരുന്ന സിനിമയ്ക്കായി വലിയ പ്രതീക്ഷയിലാണ് ആരാധകർ. അടുത്തിടെ പുറത്തിറങ്ങിയ റെഡ്-ഗോൾഡൻ റെട്രോ പശ്ചാത്തലത്തിലുള്ള ഫസ്റ്റ് ലുക്കും ശ്രദ്ധ നേടിയിരുന്നു.
ടൊവിനോ തോമസിനൊപ്പം നസ്‌ലൻ, കുഞ്ചാക്കോ ബോബൻ, സൗബിൻ ഷാഹിർ, ഷറഫുദ്ദീൻ, ശ്രീനാഥ് ഭാസി, ചന്തു സലിംകുമാർ, ഷൈൻ ടോം ചാക്കോ, പാരിസ് ലക്ഷ്മി, നാദിയ മൊയ്തു, രജിഷ വിജയൻ, ജ്യോതിർമയി, ഹൻസിക കൃഷ്ണകുമാർ തുടങ്ങി വൻ താരനിരയാണ് ചിത്രത്തിൽ അണിനിരക്കുന്നത്.
അമൽ നീരദ് പ്രൊഡക്ഷൻസ്, അൻവർ റഷീദ് എന്റർടെയ്ൻമെന്റ്സ്, ഫഹദ് ഫാസിൽ ആൻഡ് ഫ്രണ്ട്സ് എന്നീ ബാനറുകൾ ചേർന്നാണ് ചിത്രം നിർമിക്കുന്നത്. അപ്പു പ്രഭാകറാണ് ഛായാഗ്രഹണം. വിവേക് ഹർഷൻ എഡിറ്റിങ്ങും ക്രിസ്റ്റോ സേവ്യർ സംഗീതവും നിർവഹിക്കുന്നു. ഉണ്ണി ആർ ആണ് സംഭാഷണം. സൗണ്ട് ഡിസൈൻ തപസ് നായക്, പ്രൊഡക്ഷൻ ഡിസൈൻ ജോസഫ് നെല്ലിക്കൽ, കോസ്റ്റ്യൂം മഷർ ഹംസ, മേക്കപ്പ് റോണക്സ് സേവ്യർ എന്നിവരാണ് മറ്റ് അണിയറ പ്രവർത്തകർ.
