ദില്ലി: സാധാരണക്കാരുടെ ട്രെയിന്‍ യാത്രാനുഭവം സൂപ്പറാക്കാനുള്ള ‘സൂപ്പര്‍ ആപ്പു’മായി ഇന്ത്യന്‍ റെയില്‍വേ എത്തുകയാണ്. ഇനി ഇന്ത്യന്‍ റെയില്‍വേ സേവനങ്ങള്‍ തപ്പി ഒരു ഡസന്‍ ആപ്പുകളിലും സൈറ്റുകളിലും കയറിയിറങ്ങണ്ട. ആപ്പിലൂടെ ഒരുകൂട്ടം റെയില്‍വേ സേവനങ്ങളെ ലഭ്യമാക്കാനാണ് ശ്രമം. ഈ മാസം തന്നെ ആപ്പ് പുറത്തിറക്കാനാണ് തീരുമാനം. സെന്റര്‍ ഫോര്‍ റെയില്‍വേ ഇന്‍ഫര്‍മേഷന്‍ സിസ്റ്റംസുമായി സഹകരിച്ചാണ് ആപ്പ് വികസിപ്പിച്ചിരിക്കുന്നത്. ഐആര്‍സിടിസി ആപ്പും വെബ്സൈറ്റും അപ്ഗ്രേഡ് ചെയ്താണ് ഐആര്‍സിടിസി സൂപ്പര്‍ ആപ്പ് ഒരുക്കുന്നത്.
സൂപ്പര്‍ ആപ്പിന്റെ വരവോടെ ഐആര്‍സിടിസി റെയില്‍ കണക്ട്, യുടിഎസ്, റെയില്‍ മദദ് എന്നിങ്ങനെ വിവിധ ആപ്പുകളിലെ സേവനങ്ങള്‍ ഒറ്റ ആപ്പിനുള്ളില്‍ തന്നെ ലഭ്യമാവും. ടിക്കറ്റ് ബുക്കിംഗ്, പ്ലാറ്റ്ഫോം ടിക്കറ്റ് ബുക്കിംഗ്, ട്രെയിന്‍ ട്രാക്ക് ചെയ്യാനുള്ള സൗകര്യം, കാറ്ററിംഗ് സേവനങ്ങള്‍, പിഎന്‍ആര്‍ സ്റ്റാറ്റസ് ചെക്കിംഗ് എന്നിങ്ങനെയുള്ള അനവധി സേവനങ്ങള്‍ പുതിയ ഐആര്‍സിടിസി സൂപ്പര്‍ ആപ്പില്‍ ലഭിക്കും. ചരക്കുനീക്കം ഉള്‍പ്പടെയുള്ള സേവനങ്ങള്‍ ബുക്ക് ചെയ്യാനുമാകും. പുതിയ ആപ്പില്‍ അതിവേഗമുള്ള പേയ്‌മെന്റ് സംവിധാനവും വരും. പുതിയ ആപ്പ് ഇന്ത്യന്‍ റെയില്‍വേ പ്രഖ്യാപിച്ചത് സെപ്റ്റംബറിലാണ്. സൂപ്പര്‍ ആപ്പ് പുറത്തിറക്കുന്ന തീയ്യതി പ്രഖ്യാപിച്ചിട്ടില്ല. സൂപ്പര്‍ ആപ്പ് വരുമ്പോഴെങ്കിലും റെയില്‍വേ ടിക്കറ്റ് ബുക്കിംഗിലെ സാങ്കേതിക പ്രശ്നങ്ങളും ഊരാക്കുടുക്കുകളും മാറുമോ എന്ന ആകാംക്ഷയിലാണ് യാത്രക്കാര്‍.
