പോഷകങ്ങളുടെ കലവറയായതു കൊണ്ടുതന്നെ ഇന്ന് ലോകമെമ്പാടും ഏറെ ജനപ്രിയമായ ഒരു പഴമാണ് അവക്കാഡോ അഥവാ ബട്ടർ ഫ്രൂട്ട്. സൂപ്പർ ഫുഡ് എന്നറിയപ്പെടുന്ന അവക്കാഡോ ദിവസവും ഭക്ഷണത്തിൽ ഉൾപ്പെടുത്തുന്നത് ശരീരത്തിന് ഒട്ടനവധി ആരോഗ്യ ഗുണങ്ങളാണ് സമ്മാനിക്കുന്നത്. ഹൃദയാരോഗ്യം സംരക്ഷിക്കുന്നത് മുതൽ ശരീരഭാരം കുറയ്ക്കാൻ വരെ അവക്കാഡോ എങ്ങനെ സഹായിക്കുന്നു എന്ന് നോക്കാം…
രുചിയിൽ മാത്രമല്ല ഗുണത്തിലും മുന്നിലാണ് അവക്കാഡോ. കലോറി കുറഞ്ഞതും വൈറ്റമിനുകളാൽ സമ്പന്നവുമായ ഈ പഴത്തിന്റെ പ്രധാന ആരോഗ്യ ഗുണങ്ങൾ ഇവയൊക്കെയാണ്.
1. ഹൃദ്രോഗ സാധ്യത കുറയ്ക്കുന്നു ഹൃദയാരോഗ്യത്തിന് ഏറ്റവും ആവശ്യമായ മോണോസാച്ചുറേറ്റഡ് കൊഴുപ്പുകൾ അവക്കാഡോയിൽ ധാരാളമുണ്ട്. ഇതിനുപുറമേ നാരുകൾ, വിറ്റാമിൻ K, E, C, ഫോളേറ്റ് എന്നിവയും ഇതിലടങ്ങിയിരിക്കുന്നതിനാൽ ഹൃദ്രോഗ സാധ്യതകളെ ഇത് ഗണ്യമായി കുറയ്ക്കുന്നു.
2. വിവിധ രോഗങ്ങളെ അകറ്റി നിർത്തുന്നു നമ്മൾ കഴിക്കുന്ന സസ്യാധിഷ്ഠിത ഭക്ഷണങ്ങളിൽ അടങ്ങിയിരിക്കുന്ന, കൊഴുപ്പിൽ ലയിക്കുന്ന വിറ്റാമിനുകളായ എ, ഡി, ഇ, കെ എന്നിവയെ എളുപ്പത്തിൽ ആഗിരണം ചെയ്യാൻ ശരീരത്തെ സഹായിക്കുന്നത് അവക്കാഡോയിലെ ആരോഗ്യകരമായ കൊഴുപ്പുകളാണ്. ഇത് ശരീരത്തിന്റെ രോഗപ്രതിരോധ ശേഷി വർദ്ധിപ്പിക്കുന്നു.
3. ദഹനം എളുപ്പമാക്കുന്നു ഒരു അവക്കാഡോയിൽ നിന്ന് ഏകദേശം 14 ഗ്രാം വരെ നാരുകൾ (Fibre) ശരീരത്തിന് ലഭിക്കും. ഇത് കുടലിലെ നല്ല ബാക്ടീരിയകളുടെ വളർച്ചയ്ക്കും സുഗമമായ ദഹന പ്രക്രിയയ്ക്കും ഏറെ ഉത്തമമാണ്.
4. കണ്ണുകളെ സംരക്ഷിക്കുന്നു കണ്ണുകളുടെ ആരോഗ്യത്തിന് ആവശ്യമായ ല്യൂട്ടിൻ, സിയാക്സാന്തിൻ തുടങ്ങിയ ആന്റിഓക്സിഡന്റുകൾ അവക്കാഡോയിൽ അടങ്ങിയിട്ടുണ്ട്. ഇത് പ്രായമാകുമ്പോൾ ഉണ്ടാകുന്ന തിമിരം, മാക്യുലർ ഡീജനറേഷൻ തുടങ്ങിയ കാഴ്ച പ്രശ്നങ്ങളിൽ നിന്ന് കണ്ണുകളെ സംരക്ഷിക്കുന്നു.
5. ചർമ്മത്തെ സംരക്ഷിക്കുന്നു തിളങ്ങുന്ന ചർമ്മം ആഗ്രഹിക്കുന്നവർക്ക് അവക്കാഡോ മികച്ചൊരു ഔഷധമാണ്. ഇതിലടങ്ങിയിരിക്കുന്ന ഉയർന്ന അളവിലുള്ള വിറ്റാമിൻ ഇ, സി എന്നിവ ചർമ്മത്തിലെ കൊളാജൻ ഉൽപാദനത്തെ ഉത്തേജിപ്പിക്കുകയും ചുളിവുകൾ വീഴാതെ ചർമ്മത്തെ യുവത്വത്തോടെ നിലനിർത്തുകയും ചെയ്യുന്നു.
6. ശരീരഭാരം കുറയ്ക്കുന്നു ശരീരഭാരം കുറയ്ക്കാൻ ആഗ്രഹിക്കുന്നവർക്ക് തങ്ങളുടെ ഡയറ്റിൽ ധൈര്യമായി അവക്കാഡോ ഉൾപ്പെടുത്താം. ഇതിലെ ആരോഗ്യകരമായ കൊഴുപ്പും നാരുകളും വയർ നിറഞ്ഞ അവസ്ഥ നിലനിർത്തുന്നതിനാൽ അമിതമായി ഭക്ഷണം കഴിക്കുന്ന ശീലം തനിയെ ഇല്ലാതാകും.
7. മുടിയെ കരുത്തുള്ളതാക്കുന്നു അവക്കാഡോ പതിവായി കഴിക്കുന്നത് തലയോട്ടിയിലെ ആരോഗ്യം മെച്ചപ്പെടുത്തും. മുടിയുടെ വരൾച്ച മാറ്റി മുടി പൊട്ടിപ്പോകുന്നത് തടയാനും മുടി വളർച്ച വേഗത്തിലാക്കാനും ഇത് സഹായിക്കുന്നു.
ആരോഗ്യകരമായ ഒരു ജീവിതശൈലിക്ക് ദിവസവും ഒരു അവക്കാഡോ വീതം ശീലമാക്കുന്നത് ശരീരത്തിന് മികച്ച ഊർജ്ജവും ഉന്മേഷവും നൽകും.
