ശ്വാസകോശത്തിൽ അമരക്കായക്കുരു കുടുങ്ങി ഒന്നരവയസ്സുകാരന് ദാരുണാന്ത്യം. പറപ്പൂക്കര തോട്ടുങ്ങൽ പുതുപ്പുള്ളിപ്പറമ്പിൽ റൂബി–അനു ദമ്പതികളുടെ മകൻ ഏയ്ബലാണ് മരിച്ചത്. വെള്ളിയാഴ്ചയായിരുന്നു സംഭവം.
കുട്ടി അസ്വസ്ഥത പ്രകടിപ്പിച്ചതിനെ തുടർന്ന് പറപ്പൂക്കര അസീസി മിഷൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. രാവിലെ കുട്ടി മിഠായി കഴിച്ചിരുന്നു. ഇതിനെ തുടർന്ന് തൊണ്ടയിൽ മിഠായി കുടുങ്ങിയതാകാമെന്നാണ് ആദ്യം കരുതിയത്.
എന്നാൽ പോസ്റ്റ്മോർട്ടം പരിശോധനയിലാണ് ശ്വാസകോശത്തിൽ ഭക്ഷണത്തോടൊപ്പം അമരക്കായക്കുരുവും കണ്ടെത്തിയത്. ഇതാണ് മരണകാരണമെന്നാണ് പ്രാഥമിക നിഗമനം.
സംഭവത്തിൽ പുതുക്കാട് പൊലീസ് മേൽനടപടികൾ സ്വീകരിച്ചു. സംസ്കാരം ശനിയാഴ്ച രാവിലെ 10 മണിക്ക് പറപ്പൂക്കര സെന്റ് ജോൺസ് നെപ്യുസാൻ ഫൊറോന പള്ളി സെമിത്തേരിയിൽ നടക്കും.
സഹോദരൻ: ആരോൺ.




