മലപ്പുറം: പരപ്പനങ്ങാടി–നാടുകാണി സംസ്ഥാനപാതയിൽ വൻ മണ്ണിടിച്ചിൽ. റോഡിലേക്ക് കൂറ്റൻ തോതിൽ മണ്ണ് ഇടിഞ്ഞുവീണതോടെ ഇതുവഴിയുള്ള ഗതാഗതം പൂർണമായും തടസ്സപ്പെട്ടു. വ്യവസായ വകുപ്പ് മന്ത്രി പി.കെ. കുഞ്ഞാലിക്കുട്ടിയുടെ വീടിന് സമീപത്താണ് സംഭവം.
ഇന്നലെ രാത്രി മുതൽ പ്രദേശത്ത് മണ്ണിടിച്ചിൽ ആരംഭിച്ചിരുന്നുവെന്നാണ് നാട്ടുകാർ പറയുന്നത്. സ്കൂളുകളും വീടുകളും ഉൾപ്പെടുന്ന ജനവാസമേഖലയിലാണ് മണ്ണ് ഇടിഞ്ഞത്. നിരവധി തെങ്ങുകളും മരങ്ങളും കടപുഴകി വീണതായും പ്രദേശവാസികൾ അറിയിച്ചു.
അശാസ്ത്രീയമായി ജെസിബി ഉപയോഗിച്ച് മണ്ണെടുത്തതാണ് മണ്ണിടിച്ചിലിന് കാരണമെന്ന് നാട്ടുകാർ ആരോപിച്ചു. അപകടസാധ്യത നേരത്തെ തന്നെ റവന്യൂ അധികൃതരെ അറിയിക്കുകയും പരിശോധന ആവശ്യപ്പെടുകയും ചെയ്തിരുന്നെങ്കിലും സമയോചിതമായ ഇടപെടൽ ഉണ്ടായില്ലെന്നാണ് അവരുടെ പരാതി. ഗതാഗതം നിയന്ത്രിക്കാൻ ഒരു പൊലീസ് ഉദ്യോഗസ്ഥൻ മാത്രമാണ് സ്ഥലത്തുണ്ടായിരുന്നതെന്നും നാട്ടുകാർ ആരോപിച്ചു.
സംഭവത്തെക്കുറിച്ച് പ്രതികരിച്ച മന്ത്രി പി.കെ. കുഞ്ഞാലിക്കുട്ടി, മണ്ണിടിച്ചിലിന്റെ ദൃശ്യങ്ങൾ കണ്ടതായും ബന്ധപ്പെട്ട ഉദ്യോഗസ്ഥരുമായി സംസാരിച്ചതായും അറിയിച്ചു.
ആശുപത്രിക്കായി സർക്കാർ സൗജന്യമായി നൽകിയ സ്ഥലത്താണ് അപകടമുണ്ടായതെന്നും അവിടെ അശാസ്ത്രീയമായി മണ്ണെടുത്തതായും അദ്ദേഹം ആരോപിച്ചു. ജില്ലാ കളക്ടറെയും പൊലീസ് മേധാവിയെയും വിവരം അറിയിച്ചിട്ടുണ്ടെന്നും നിർമാണ പ്രവർത്തനങ്ങൾ താൽക്കാലികമായി നിർത്തിവെക്കാൻ നിർദേശം നൽകിയതായും മന്ത്രി പറഞ്ഞു. സമീപത്ത് മറ്റ് കെട്ടിടങ്ങളില്ലെന്നും സ്കൂളിൽ നിന്ന് അകലെ ഭാഗത്താണ് മണ്ണിടിച്ചിലെന്നും അദ്ദേഹം കൂട്ടിച്ചേർത്തു. അതേസമയം, സ്വകാര്യ ഭൂമിയിലാണ് മണ്ണെടുപ്പ് നടന്നതെന്നാണ് മലപ്പുറം നഗരസഭ ചെയർപേഴ്സൺ റിൻഷയുടെ വിശദീകരണം. നഗരസഭയുടെ അനുമതിയില്ലാതെയാണ് നിർമാണ പ്രവർത്തനങ്ങൾ നടന്നതെന്നും ഇതിനായി അപേക്ഷ പോലും നൽകിയിരുന്നില്ലെന്നും അവർ പറഞ്ഞു. സംഭവസ്ഥലം സന്ദർശിച്ച് തുടർനടപടികൾ സ്വീകരിക്കുമെന്നും റിൻഷ അറിയിച്ചു.
ഇതിനിടെ, ആശുപത്രി പദ്ധതിക്കായി അല്ല ഈ സ്ഥലത്ത് നിർമാണ പ്രവർത്തനം നടന്നിരുന്നതെന്ന് വാർഡ് കൗൺസിലർ കെ.കെ. ഉമ്മറും വ്യക്തമാക്കി. സംഭവത്തിന്റെ പശ്ചാത്തലത്തിൽ മണ്ണെടുപ്പ് നിയമാനുസൃതമായിരുന്നോ എന്നതടക്കമുള്ള കാര്യങ്ങളിൽ അന്വേഷണം ആവശ്യപ്പെട്ട് നാട്ടുകാർ രംഗത്തെത്തിയിട്ടുണ്ട്.
