മലപ്പുറം: കാണാതായ മലപ്പുറം ചേലേമ്പ്ര സ്വദേശിയും പ്രശസ്ത വ്ലോഗറുമായ മുഹമ്മദ് ദിൽഷാദിനെ കണ്ടെത്തി. മേഘാലയയിൽ വെച്ച് ബൈക്ക് അപകടത്തിൽപെട്ട് ആശുപത്രിയിൽ ചികിത്സയിലാണ് ദിൽഷാദ്. വനമേഖലയോട് ചേർന്ന ഭാഗത്തുനിന്നാണ് ഇദ്ദേഹത്തെ കണ്ടെത്തിയത്. നിലവിൽ ആരോഗ്യനില മെച്ചപ്പെട്ടുവരുന്ന സാഹചര്യത്തിൽ അദ്ദേഹത്തെ നാട്ടിലേക്ക് എത്തിക്കാനുള്ള നടപടികൾ സ്വീകരിച്ചിട്ടുണ്ട്.
മലപ്പുറം ചേലേമ്പ്ര പുല്ലിപ്പറമ്പ് പാറയിൽ സ്വദേശിയാണ് ദിൽഷാദ്. ‘യാത്ര ടുഡേ’ (Yathra Today) എന്ന യൂട്യൂബ് ചാനലിലൂടെ നിരവധി യാത്രാവിശേഷങ്ങൾ പങ്കുവെക്കുന്ന ഇദ്ദേഹത്തിന് വലിയൊരു ഫോളോവേഴ്സ് നിരതന്നെയുണ്ട്. ചാനലിന്റെ ഭാഗമായി വിവിധ സ്ഥലങ്ങളിലേക്ക് യാത്രകൾ നടത്തുന്നതിന്റെ ഭാഗമായി കഴിഞ്ഞ ജൂൺ ആറിനാണ് ദിൽഷാദ് വീട്ടിൽനിന്ന് യാത്ര പുറപ്പെട്ടത്.
എന്നാൽ കഴിഞ്ഞ നാലു ദിവസമായി ദിൽഷാദിനെക്കുറിച്ച് യാതൊരു വിവരവും ലഭ്യമല്ലാതായതോടെ കുടുംബാംഗങ്ങൾ തേഞ്ഞിപ്പലം പൊലീസിൽ പരാതി നൽകുകയായിരുന്നു. പരാതിയുടെ അടിസ്ഥാനത്തിൽ പൊലീസ് അന്വേഷണം ഊർജ്ജിതമാക്കിയിരുന്നു. ഇതിനിടയിലാണ് വ്ലോഗർ സുരക്ഷിതനാണെന്നുമുള്ള വിവരവും ആശുപത്രിയിൽ ചികിത്സയിലാണെന്നുമുള്ള വാർത്തയും പുറത്തുവരുന്നത്.
