പൊന്നാനിയിലെ സത്കാര വിവാദത്തിൽ പ്രതികരണവുമായി മുഖ്യമന്ത്രി വി.ഡി. സതീശൻ. താൻ സത്കാരത്തിനല്ല പോയതെന്നും സുഹൃത്തിന്റെ വീട്ടിൽ നിന്നാണ് ഭക്ഷണം കഴിച്ചതെന്നും മുഖ്യമന്ത്രി വ്യക്തമാക്കി. വിഷയത്തിൽ ഉയരുന്ന വിമർശനങ്ങൾ അടിസ്ഥാനരഹിതമാണെന്നും അദ്ദേഹം പറഞ്ഞു.
ഭക്ഷണം കഴിച്ചതിൽ എന്താണ് തെറ്റെന്നും, അതിൽ ഔചിത്യക്കുറവുണ്ടായെന്ന് പറയാനാകില്ലെന്നും അദ്ദേഹം വ്യക്തമാക്കി. താൻ സത്കാരത്തിനല്ല പോയതെന്നും, ഭക്ഷണം കഴിച്ചതിന്റെ പേരിൽ ഹീനമായ അപവാദ പ്രചാരണമാണിപ്പോൾ നടക്കുന്നതെന്നും മുഖ്യമന്ത്രി ആരോപിച്ചു.
യാത്രയ്ക്കിടയിലും ബന്ധപ്പെട്ട ഉദ്യോഗസ്ഥരുമായി നിരന്തരം ബന്ധപ്പെടുകയും ആവശ്യമായ നിർദേശങ്ങൾ നൽകുകയും ചെയ്തിരുന്നുവെന്നും അദ്ദേഹം പറഞ്ഞു. 2018-19 പ്രളയകാലത്ത് അന്നത്തെ മുഖ്യമന്ത്രിയെ ഉദ്ധരിച്ച് രാഷ്ട്രീയ വിമർശനവും മുഖ്യമന്ത്രി ഉന്നയിച്ചു.
ഹെലികോപ്റ്റർ യാത്രയെക്കുറിച്ചുള്ള ആരോപണങ്ങൾക്കും മുഖ്യമന്ത്രി മറുപടി നൽകി. ഔദ്യോഗിക ആവശ്യത്തിനായാണ് ഹെലികോപ്റ്റർ ഉപയോഗിച്ചതെന്നും, നിക്ഷേപ ചർച്ചകളിൽ പങ്കെടുക്കാനായിരുന്നു യാത്രയെന്നും വ്യക്തമാക്കി. ആദ്യം വന്ദേ ഭാരതിൽ യാത്ര ചെയ്യാനായിരുന്നു ടിക്കറ്റ് ബുക്ക് ചെയ്തിരുന്നതെങ്കിലും, നിക്ഷേപക സംഘത്തിന്റെ സമയപരിമിതി കണക്കിലെടുത്താണ് ഹെലികോപ്റ്റർ ഉപയോഗിച്ചതെന്നും അദ്ദേഹം പറഞ്ഞു.
തന്റെ യാത്ര മൂലം സർക്കാരിന് അധിക സാമ്പത്തിക ബാധ്യത ഉണ്ടായിട്ടില്ലെന്നും, മുൻ സർക്കാർ നിശ്ചയിച്ച നിരക്കിലാണ് ഹെലികോപ്റ്റർ ഉപയോഗിച്ചതെന്നും മുഖ്യമന്ത്രി വ്യക്തമാക്കി. മുൻ മുഖ്യമന്ത്രിക്കെതിരെയും എസ്.ഡി.ആർ.എഫ്. ഫണ്ട് ഉപയോഗിച്ചതുമായി ബന്ധപ്പെട്ട രാഷ്ട്രീയ ആരോപണവും അദ്ദേഹം ഉന്നയിച്ചു.
