ഇന്ന് നവംബർ 19, അന്താരാഷ്ട്ര പുരുഷ ദിനം. സമൂഹത്തിന്റെയും കുടുംബത്തിന്റെയും രാഷ്ട്രത്തിന്റെയും നിർമാണത്തിൽ പുരുഷന്മാർ നൽകുന്ന സംഭാവനകളെ ആദരിക്കുന്നതിനൊപ്പം, അവർ നേരിടുന്ന ശാരീരികവും മാനസികവുമായ ആരോഗ്യപ്രശ്നങ്ങളും സാമൂഹിക വെല്ലുവിളികളും ചർച്ച ചെയ്യുന്നതിനുള്ള ദിനം കൂടിയാണിത്. ‘ഭാവി എല്ലാവരുടേതുമാണ്’ എന്നതാണ് ഈ വർഷത്തെ ദിനാചരണത്തിന്റെ പ്രമേയം.
‘ആണുങ്ങൾ തളരാൻ പാടില്ല’ എന്ന സാമൂഹിക കാഴ്ചപ്പാട് പല പുരുഷന്മാരെയും തങ്ങളുടെ മാനസിക ബുദ്ധിമുട്ടുകൾ തുറന്നുപറയുന്നതിൽ നിന്ന് പിന്തിരിപ്പിക്കുന്നുണ്ട്. ഇത്തരം പ്രവണതകൾ കടുത്ത മാനസിക സമ്മർദ്ദത്തിലേക്കും വിഷാദത്തിലേക്കും ചിലപ്പോൾ ആത്മഹത്യാ പ്രവണതകളിലേക്കും നയിക്കാറുണ്ട്. പുരുഷന്മാരുടെ മാനസികാരോഗ്യത്തിന് അർഹമായ പരിഗണന നൽകേണ്ടതിന്റെ ആവശ്യകതയും ഈ ദിനം ഓർമിപ്പിക്കുന്നു.
ഭർത്താവ്, പിതാവ്, മകൻ, സഹോദരൻ തുടങ്ങിയ നിലകളിൽ കുടുംബത്തിനും സമൂഹത്തിനും പുരുഷന്മാർ നൽകുന്ന പിന്തുണയും ത്യാഗങ്ങളും അംഗീകരിക്കുക, മാതൃകാപരമായ ജീവിതം നയിക്കുന്ന പുരുഷന്മാരെ സമൂഹത്തിന് പരിചയപ്പെടുത്തുക, ശാരീരികവും മാനസികവുമായ ആരോഗ്യപ്രശ്നങ്ങൾക്ക് മുൻഗണന നൽകുക എന്നിവയാണ് ദിനാചരണത്തിന്റെ പ്രധാന ലക്ഷ്യങ്ങൾ.
ഇതിനൊപ്പം പുരുഷന്മാർക്കിടയിലെ വർധിച്ചുവരുന്ന മാനസിക സമ്മർദ്ദവും ആത്മഹത്യാ നിരക്കും ഗൗരവത്തോടെ കാണുക, നിയമപരവും സാമൂഹികവുമായ മേഖലകളിൽ അവർ നേരിടുന്ന അസമത്വങ്ങളും പ്രയാസങ്ങളും പരിഹരിക്കുക, സ്ത്രീപുരുഷ ബന്ധങ്ങൾ കൂടുതൽ ഊഷ്മളവും ആരോഗ്യകരവുമാക്കുക തുടങ്ങിയ വിഷയങ്ങളും ദിനാചരണം മുന്നോട്ടുവെക്കുന്നു.
സ്ത്രീയും പുരുഷനും സമൂഹത്തിന്റെ സന്തുലിതാവസ്ഥയ്ക്ക് ഒരുപോലെ അനിവാര്യമാണെന്ന സന്ദേശമാണ് അന്താരാഷ്ട്ര പുരുഷ ദിനം നൽകുന്നത്. ലിംഗഭേദമില്ലാതെ എല്ലാവർക്കും തുല്യനീതിയും പരിഗണനയും ആരോഗ്യവും സന്തോഷവും ഉറപ്പാക്കുന്ന ഒരു സമൂഹം കെട്ടിപ്പടുക്കാൻ ഈ ദിനാചരണം പ്രചോദനമാകട്ടെ.




