ബാങ്കോക്ക്: തായ്ലൻഡിലെ വിനോദസഞ്ചാര കേന്ദ്രമായ ഫുക്കറ്റിൽ വാണിജ്യ കെട്ടിടത്തിലുണ്ടായ വൻ തീപിടിത്തത്തിൽ 11 പേർ മരിച്ചതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു. അപകടത്തിൽ 36 പേരെ ആശുപത്രിയിൽ പ്രവേശിപ്പിച്ചു. വാഹന വാടക സ്ഥാപനങ്ങളും വിൽപ്പന കേന്ദ്രങ്ങളും പ്രവർത്തിച്ചിരുന്ന കെട്ടിടത്തിലാണ് തീപിടിത്തമുണ്ടായത്.
പ്രാദേശിക സമയം പുലർച്ചെ 3.17-ഓടെ പാറ്റോങ്ങിലെ ഫാംഗ് മുവാങ് സായ് കോർ റോഡിലായിരുന്നു അപകടം. പാറ്റോങ് ബീച്ചിന് സമീപമുള്ള നഗരപ്രദേശത്താണ് കെട്ടിടം സ്ഥിതി ചെയ്യുന്നത്. വാഹനങ്ങൾ വാടകയ്ക്ക് നൽകുന്ന സ്ഥാപനത്തിൽ നിന്നാണ് തീപടർന്നതെന്നും പിന്നീട് സമീപത്തെ കെട്ടിടങ്ങളിലേക്കും വ്യാപിക്കുകയായിരുന്നുവെന്നും പൊലീസ് അറിയിച്ചു.
ഏകദേശം രണ്ട് മണിക്കൂർ നീണ്ട പരിശ്രമത്തിനൊടുവിലാണ് അഗ്നിശമനസേന തീ നിയന്ത്രണവിധേയമാക്കിയത്. കെട്ടിടത്തിന്റെ താഴത്തെ നിലയിൽ നൂറിലധികം മോട്ടോർസൈക്കിളുകൾ പാർക്ക് ചെയ്തിരുന്നു. ഇവയിലെ ഇന്ധനം, റബർ ടയറുകൾ, പ്ലാസ്റ്റിക് ഭാഗങ്ങൾ എന്നിവ തീ അതിവേഗം പടരാൻ കാരണമായെന്നാണ് പാറ്റോങ് മുനിസിപ്പാലിറ്റി ഡെപ്യൂട്ടി മേയർ സനകോൺ കീസിൻ പ്രതികരിച്ചത്.
തീപിടിത്തമുണ്ടായതോടെ കെട്ടിടത്തിലുണ്ടായിരുന്ന പലരും രക്ഷപ്പെടാനായി മുകളിലത്തെ നിലകളിലേക്ക് ഓടിക്കയറി. എന്നാൽ കനത്ത പുക കാരണം പലർക്കും പുറത്തുകടക്കാനായില്ല. തീപിടിക്കാൻ സാധ്യതയുള്ള വസ്തുക്കളും പുകയും രക്ഷാപ്രവർത്തനത്തിന് വെല്ലുവിളിയായി. പിന്നീട് രക്ഷാപ്രവർത്തകർ കെട്ടിടത്തിനുള്ളിൽ പ്രവേശിച്ച് ആളുകളെ സുരക്ഷിത സ്ഥാനങ്ങളിലേക്ക് മാറ്റി.
പ്രാഥമിക വിലയിരുത്തലുകൾ പ്രകാരം അഞ്ച് വാണിജ്യ സ്ഥാപനങ്ങൾക്കും സമീപത്ത് പാർക്ക് ചെയ്തിരുന്ന നിരവധി മോട്ടോർസൈക്കിളുകൾക്കും കേടുപാടുകൾ സംഭവിച്ചിട്ടുണ്ട്. പുക ശ്വസിച്ചതാണ് മരണങ്ങളിൽ ഭൂരിഭാഗത്തിനും കാരണമെന്നാണ് പ്രാഥമിക നിഗമനം. മരിച്ചവരിൽ തായ്ലൻഡ്, മ്യാൻമർ സ്വദേശികളുണ്ടെന്നാണ് വിവരം.
വൈദ്യുത ഷോർട്ട് സർക്യൂട്ടാകാം തീപിടിത്തത്തിന് കാരണമെന്നാണ് അധികൃതരുടെ പ്രാഥമിക സംശയം. സംഭവത്തിൽ വിശദമായ അന്വേഷണം ആരംഭിച്ചിട്ടുണ്ട്.
തായ്ലൻഡിൽ മുൻപും സമാനമായ തീപിടിത്ത ദുരന്തങ്ങൾ ഉണ്ടായിട്ടുണ്ട്. 2022-ൽ രാജ്യത്തിന്റെ കിഴക്കൻ മേഖലയിലെ മ്യൂസിക് പബ്ബിലുണ്ടായ തീപിടിത്തത്തിൽ 14 പേർ മരിച്ചിരുന്നു. 2009 ജനുവരി ഒന്നിന് ബാങ്കോക്കിലെ സാന്റിക്ക നൈറ്റ്ക്ലബ്ബിലുണ്ടായ തീപിടിത്തത്തിൽ 67 പേർ മരിക്കുകയും 200-ലധികം പേർക്ക് പരിക്കേൽക്കുകയും ചെയ്തിരുന്നു. ഇത്തരം ദുരന്തങ്ങൾ രാജ്യത്തെ കെട്ടിടങ്ങളുടെയും വാണിജ്യ സ്ഥാപനങ്ങളുടെയും അഗ്നിസുരക്ഷാ സംവിധാനങ്ങളെക്കുറിച്ചുള്ള ആശങ്കകൾ വീണ്ടും ഉയർത്തുകയാണ്.




