മലപ്പുറം: ജാമ്യത്തിലിറങ്ങിയ ശേഷം വിചാരണ നടപടികൾക്ക് കോടതിയിൽ ഹാജരാകാതെ ഒളിവിൽ കഴിഞ്ഞ പോക്സോ കേസ് പ്രതിയെ തമിഴ്നാട്ടിൽ നിന്ന് പിടികൂടി. അസം നാഗോൺ സ്വദേശി അലീമുൽ ഹഖിനെയാണ് മലപ്പുറം പൊലീസ് കോയമ്പത്തൂരിൽ നിന്ന് അറസ്റ്റ് ചെയ്തത്.
മലപ്പുറം പൊലീസ് രജിസ്റ്റർ ചെയ്ത പോക്സോ കേസിലെ പ്രതിയാണ് അലീമുൽ ഹഖ്. കേസിൽ ജാമ്യം ലഭിച്ച് പുറത്തിറങ്ങിയ ഇയാൾ പിന്നീട് കോടതി നടപടികളിൽ നിന്ന് വിട്ടുനിൽക്കുകയായിരുന്നു. വിചാരണയുടെ വിവിധ ഘട്ടങ്ങളിൽ ഹാജരാകാൻ കോടതി നിർദേശിച്ചിട്ടും ഇയാൾ എത്തിയില്ല.
ഇതോടെ മഞ്ചേരി സ്പെഷ്യൽ കോടതി പ്രതിക്കെതിരെ അറസ്റ്റ് വാറണ്ട് പുറപ്പെടുവിച്ചു. തുടർന്ന് പ്രതിയെ കണ്ടെത്തുന്നതിനായി പൊലീസ് അന്വേഷണം ആരംഭിച്ചു.
പ്രതി തമിഴ്നാട്ടിൽ ഒളിവിൽ കഴിയുന്നതായി വിവരം ലഭിച്ചതോടെ അന്വേഷണം കോയമ്പത്തൂരിലേക്ക് വ്യാപിപ്പിച്ചു. തുടർന്ന് കോയമ്പത്തൂർ ജില്ലയിലെ തൊണ്ടമുതൂരിൽ നടത്തിയ പരിശോധനയിലാണ് അലീമുൽ ഹഖിനെ പിടികൂടിയത്.
തമിഴ്നാട്ടിൽ നിന്ന് കസ്റ്റഡിയിലെടുത്ത പ്രതിയെ തുടർ നിയമനടപടികൾക്കായി കോടതിയിൽ ഹാജരാക്കി. കോടതി നടപടികളിൽ നിന്ന് വിട്ടുനിൽക്കുന്ന പ്രതികളെ കണ്ടെത്തി നിയമത്തിന് മുന്നിലെത്തിക്കുന്നതിന്റെ ഭാഗമായാണ് നടപടിയെന്ന് പൊലീസ് അറിയിച്ചു.
