മലയാള സിനിമയിലും നാടകത്തിലും സാഹിത്യലോകത്തും ഒരുപോലെ വ്യക്തിമുദ്ര പതിപ്പിച്ച അതുല്യപ്രതിഭ ആർ. നരേന്ദ്രപ്രസാദ് വിടവാങ്ങിയിട്ട് ഇന്ന് 23 വർഷം. നടൻ എന്നതിലുപരി നാടകപ്രവർത്തകൻ, നാടകകൃത്ത്, സംവിധായകൻ, സാഹിത്യനിരൂപകൻ, അധ്യാപകൻ തുടങ്ങി വിവിധ മേഖലകളിൽ നിറസാന്നിധ്യമായിരുന്ന അദ്ദേഹം മലയാളത്തിന്റെ സാംസ്കാരിക ചരിത്രത്തിൽ തന്റേതായ ഇടം നേടിയ വ്യക്തിത്വമാണ്.
മൂന്നരപ്പതിറ്റാണ്ടിലേറെക്കാലം മലയാളത്തിന്റെ സാഹിത്യ-സാംസ്കാരിക മേഖലകളിൽ സജീവമായിരുന്നു നരേന്ദ്രപ്രസാദ്. കോളജ് അധ്യാപകനായിരിക്കെയാണ് എൺപതുകളിൽ അദ്ദേഹം നാടകപ്രവർത്തനങ്ങളിൽ സജീവമാകുന്നത്. നാടകവേദിയിലെ പതിവുസങ്കൽപങ്ങളെ തിരുത്തിയെഴുതിയ അദ്ദേഹം ‘നാട്യഗൃഹം’ എന്ന നാടകസംഘത്തിന് രൂപം നൽകി. 1981ൽ നാട്യഗൃഹം അവതരിപ്പിച്ച ‘സൗപർണിക’ ആധുനിക മലയാള നാടകവേദിയിലെ ശ്രദ്ധേയമായ വഴിത്തിരിവായി. മലയാള നാടകത്തിന് നാട്യഗൃഹം നൽകിയ മറ്റൊരു പ്രധാന സംഭാവനയായിരുന്നു ‘ചൊൽക്കാഴ്ച’ എന്ന പോയട്രി തിയറ്റർ.
1989ൽ പുറത്തിറങ്ങിയ ‘അസ്ഥികൾ പൂക്കുന്നു’ എന്ന ചിത്രത്തിലൂടെയായിരുന്നു സിനിമാരംഗത്തേക്കുള്ള അരങ്ങേറ്റം. പിന്നീട് വില്ലനായും അച്ഛനായും രാഷ്ട്രീയക്കാരനായും ഹാസ്യകഥാപാത്രമായും വെള്ളിത്തിരയിൽ വിസ്മയം തീർത്തു. നായകകഥാപാത്രങ്ങളോട് പോലും കിടപിടിക്കുന്ന അഭിനയമികവായിരുന്നു അദ്ദേഹത്തിന്റെ കരുത്ത്.
‘തലസ്ഥാന’ത്തിലെ പരമേശ്വരൻ, ‘ഏകലവ്യ’ത്തിലെ സ്വാമി അമൂർത്താനന്ദ, ‘ആറാം തമ്പുരാനി’ലെ കുളപ്പുള്ളി അപ്പൻ, ‘മേലേപ്പറമ്പിൽ ആൺവീട്ടി’ലെ ത്രിവിക്രമൻപിള്ള, ‘ആലഞ്ചേരി തമ്പ്രാക്കളി’ലെ ചന്ദ്രപ്പൻ ഗുരുക്കൾ, ‘പൈതൃക’ത്തിലെ ദേവദത്തൻ ചെമ്മാതിരിപ്പാട് തുടങ്ങിയ കഥാപാത്രങ്ങൾ ഇന്നും പ്രേക്ഷകമനസ്സുകളിൽ നിറഞ്ഞുനിൽക്കുന്നു. ‘പൈതൃക’ത്തിലെ അഭിനയത്തിന് മികച്ച രണ്ടാമത്തെ നടനുള്ള സംസ്ഥാന ചലച്ചിത്ര പുരസ്കാരവും അദ്ദേഹത്തെ തേടിയെത്തി.
പതിനാലു വർഷം നീണ്ട സിനിമാജീവിതത്തിൽ 120ലേറെ ചിത്രങ്ങളിൽ അദ്ദേഹം വേഷമിട്ടു. ഗൗരവമുള്ള കഥാപാത്രങ്ങൾ മാത്രമല്ല, നർമ്മം നിറഞ്ഞ വേഷങ്ങളും അനായാസം കൈകാര്യം ചെയ്യാൻ കഴിയുന്ന അപൂർവ നടനായിരുന്നു നരേന്ദ്രപ്രസാദ്.
അധ്യാപനത്തിലൂടെ തലമുറകളെ പ്രചോദിപ്പിക്കുകയും നാടകത്തിലൂടെ പുതിയ ആവിഷ്കാരങ്ങൾക്ക് വഴിയൊരുക്കുകയും സിനിമയിലൂടെ അനശ്വരമായ കഥാപാത്രങ്ങളെ സമ്മാനിക്കുകയും ചെയ്ത ആ ബഹുമുഖപ്രതിഭയുടെ ഓർമകൾക്ക് മുന്നിൽ പ്രണാമം.
