തിരുവനന്തപുരം: സ്വകാര്യ കമ്പനിയായ ജി.എൻ.എയിൽ നിന്ന് വൈദ്യുതി വാങ്ങിയാലും സംസ്ഥാനത്ത് വൈദ്യുതിക്ഷാമം ഉണ്ടായേക്കുമെന്ന് കെ.എസ്.ഇ.ബി. ഹിമാചൽ പ്രദേശിൽ നിന്നുള്ള വൈദ്യുതിയാണ് കൂടുതൽ ഫലപ്രദമെന്നും കെ.എസ്.ഇ.ബി വ്യക്തമാക്കുന്നു. ഹിമാചലിൽ നിന്ന് 800 മുതൽ 1200 മെഗാവാട്ട് വരെ വൈദ്യുതി ലഭ്യമാകുമെന്നാണ് ബോർഡിന്റെ വിലയിരുത്തൽ. ജി.എൻ.എ വഴി 500 മെഗാവാട്ട് മാത്രമാണ് ലഭിക്കുക.
അതേസമയം, കുറഞ്ഞ നിരക്കിൽ വൈദ്യുതി ലഭ്യമാക്കാനാണ് സർക്കാർ മുൻഗണന നൽകുന്നതെന്ന് മുഖ്യമന്ത്രി വി.ഡി. സതീശൻ വ്യക്തമാക്കി. ഹിമാചലിൽ നിന്ന് യൂണിറ്റിന് 14.50 രൂപ നിരക്കിൽ വൈദ്യുതി വാങ്ങുമ്പോൾ 2,232 കോടി രൂപയുടെ അധിക സാമ്പത്തിക ബാധ്യതയുണ്ടാകും. എന്നാൽ ജി.എൻ.എ വഴി 8.63 രൂപയ്ക്കും 8.90 രൂപയ്ക്കും വൈദ്യുതി ലഭ്യമാക്കാനാകുമെന്നും മുഖ്യമന്ത്രി പറഞ്ഞു.
പീക്ക് സമയങ്ങളിൽ ജി.എൻ.എ വഴിയാണ് കൂടുതൽ വൈദ്യുതി ലഭിക്കുക. ജി.എൻ.എ വഴി വൈദ്യുതി വാങ്ങുമ്പോൾ യൂണിറ്റിന് 2.6 രൂപയുടെ അധിക ബാധ്യത മാത്രമാണുള്ളതെന്നും ഹിമാചൽ കരാറിൽ ഇത് 8.5 രൂപയാണെന്നും മുഖ്യമന്ത്രി വിശദീകരിച്ചു.
മുൻ മുഖ്യമന്ത്രി പിണറായി വിജയന്റെ കാലത്തും ജി.എൻ.എ ഉൾപ്പെടെയുള്ള സ്വകാര്യ കമ്പനികളിൽ നിന്ന് വൈദ്യുതി വാങ്ങിയിരുന്നുവെന്നും വി.ഡി. സതീശൻ ചൂണ്ടിക്കാട്ടി. കഴിഞ്ഞ രണ്ട് മാസങ്ങളിലും സ്വകാര്യ കമ്പനികളിൽ നിന്നാണ് വൈദ്യുതി വാങ്ങിയതെന്നും അദ്ദേഹം പറഞ്ഞു.
മന്ത്രിസഭാ യോഗത്തിന് ശേഷമുള്ള വാർത്താസമ്മേളനത്തിലാണ് വൈദ്യുതി വാങ്ങൽ കരാറുമായി ബന്ധപ്പെട്ട സർക്കാർ നിലപാട് മുഖ്യമന്ത്രി വിശദീകരിച്ചത്.
