അസം: കാസിരംഗയ്ക്ക് സമീപം മിനിബസും ട്രെക്കും കൂട്ടിയിടിച്ചുണ്ടായ അപകടത്തിൽ 24 പേർ മരിച്ചു. നിരവധി പേർക്ക് പരിക്കേറ്റു. മരണസംഖ്യ ഇനിയും ഉയർന്നേക്കുമെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്.
ബോകാഘട്ടിൽ നിന്ന് നാഗോണിലേക്ക് പോവുകയായിരുന്ന മിനിബസ് ട്രെക്കിലേക്ക് ഇടിച്ചുകയറുകയായിരുന്നു. കാസിരംഗയ്ക്ക് സമീപമുള്ള റോംഗാജനിലാണ് അപകടം നടന്നത്.
ഇടിയുടെ ആഘാതത്തിൽ ട്രെക്ക് തലകീഴായി മറിഞ്ഞു. വാഹനത്തിൽ കുടുങ്ങിയ യാത്രക്കാരെ ഏറെ പണിപ്പെട്ടാണ് പ്രദേശവാസികൾ പുറത്തെടുത്തത്. അപകടസമയത്ത് മിനിബസ് അമിതവേഗത്തിലായിരുന്നുവെന്നാണ് റിപ്പോർട്ടുകൾ.
അപകടത്തിന്റെ വ്യാപ്തി ഞെട്ടിക്കുന്നതാണെന്നും പരിക്കേറ്റവർക്ക് എത്രയും വേഗം ചികിത്സ ഉറപ്പാക്കുകയാണ് പ്രഥമ പരിഗണനയെന്നും അസം മുഖ്യമന്ത്രി ഹിമന്ത ബിശ്വ ശർമ എക്സിലൂടെ അറിയിച്ചു.
മിനിബസിന് നേരത്തെയും നിയമലംഘനങ്ങളുടെ പേരിൽ നോട്ടീസ് ലഭിച്ചിരുന്നതായും അനുവദനീയമായതിലും കൂടുതൽ യാത്രക്കാരെ കയറ്റിയിരുന്നതായും പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു.
