ന്യൂഡൽഹി: 260 പേരുടെ ജീവനെടുത്ത അഹമ്മദാബാദ് എയർ ഇന്ത്യ വിമാന ദുരന്തത്തിന്റെ അന്വേഷണം അവസാനഘട്ടത്തിലാണെന്ന് കേന്ദ്ര സർക്കാർ സുപ്രീംകോടതിയെ അറിയിച്ചു. അന്വേഷണം മനഃപൂർവം നീട്ടിക്കൊണ്ടുപോകേണ്ട സാഹചര്യമില്ലെന്നും അന്താരാഷ്ട്ര പ്രോട്ടോക്കോളുകൾ പാലിക്കേണ്ടതിനാൽ വാദം രണ്ടോ മൂന്നോ ആഴ്ചത്തേക്ക് മാറ്റിവെക്കണമെന്നും സോളിസിറ്റർ ജനറൽ തുഷാർ മേത്ത കോടതിയെ അറിയിച്ചു. തുടർന്ന് കോടതി വാദം മാറ്റിവെച്ചു.
2025 ജൂൺ 12നായിരുന്നു രാജ്യത്തെ നടുക്കിയ ദുരന്തം. ലണ്ടനിലെ ഗാറ്റ്വിക്ക് വിമാനത്താവളത്തിലേക്ക് പുറപ്പെട്ട എയർ ഇന്ത്യയുടെ ബോയിംഗ് 787-8 വിമാനം ടേക്ക് ഓഫ് ചെയ്ത് നിമിഷങ്ങൾക്കകം തകർന്നുവീഴുകയായിരുന്നു. വിമാനത്തിലുണ്ടായിരുന്ന 242 പേരിൽ 241 പേരും അപകടസ്ഥലത്തുണ്ടായിരുന്ന 19 പേരും ഉൾപ്പെടെ 260 പേരാണ് മരിച്ചത്. ഗുജറാത്ത് മുൻ മുഖ്യമന്ത്രി വിജയ് രൂപാണിയും മരിച്ചവരിൽ ഉൾപ്പെടുന്നു.
അപകടത്തിന്റെ കാരണവുമായി ബന്ധപ്പെട്ട പ്രധാന സംശയം വിമാനത്തിലെ ഫ്യൂവൽ കൺട്രോൾ സ്വിച്ചുകളെക്കുറിച്ചാണ്. 2025 ജൂലൈയിലെ പ്രാഥമിക അന്വേഷണ റിപ്പോർട്ട് പ്രകാരം, രണ്ട് എൻജിനുകളുടെയും ഫ്യൂവൽ കൺട്രോൾ സ്വിച്ചുകൾ റൺ സ്ഥാനത്തുനിന്ന് കട്ട്ഓഫ് സ്ഥാനത്തേക്ക് മാറിയതോടെ ഇന്ധനവിതരണം നിലച്ചിരുന്നു.
ഇന്ധനവിതരണം നിലച്ചതിനെക്കുറിച്ച് കോക്ക്പിറ്റിൽ പൈലറ്റുമാർ തമ്മിൽ നടന്ന സംഭാഷണവും പ്രാഥമിക റിപ്പോർട്ടിൽ പരാമർശിക്കുന്നുണ്ട്. എന്നാൽ സംഭാഷണത്തിലെ പൈലറ്റുമാരുടെ ശബ്ദം തിരിച്ചറിയാൻ കഴിഞ്ഞിട്ടില്ല. എൻജിനുകളിലേക്കുള്ള ഇന്ധനവിതരണം നിലച്ചതിന് തന്റെ മകനാണ് ഉത്തരവാദിയെന്ന അന്വേഷണ ഉദ്യോഗസ്ഥരുടെ ആരോപണത്തെ ക്യാപ്റ്റൻ സുമീത് സബർവാളിന്റെ പിതാവ് നേരത്തെ ചോദ്യം ചെയ്തിരുന്നു.
ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മാല്യ ബാഗ്ചി, എൻ.വി. അഞ്ജാരിയ എന്നിവരടങ്ങിയ ബെഞ്ചാണ് കേസ് പരിഗണിച്ചത്.
അന്തിമ അന്വേഷണ റിപ്പോർട്ട് നേരത്തെ ഒക്ടോബർ ആദ്യവാരം സമർപ്പിക്കുമെന്നാണ് കോടതിയെ അറിയിച്ചിരുന്നത്. എന്നാൽ അന്വേഷണം പൂർത്തിയാക്കാൻ കൂടുതൽ സമയം ആവശ്യമായ സാഹചര്യത്തിലാണ് കേന്ദ്രം ഇപ്പോൾ അന്വേഷണം അവസാനഘട്ടത്തിലാണെന്ന് കോടതിയെ അറിയിച്ചിരിക്കുന്നത്.




