ന്യൂഡല്ഹി: നീറ്റ്-യുജി പുനഃപരീക്ഷയ്ക്ക് മുന്നോടിയായി രാജ്യത്ത് ടെലഗ്രാം ആപ്പിന് താല്ക്കാലിക നിയന്ത്രണം. ഗൂഗിള് പ്ലേസ്റ്റോറില്നിന്ന് ടെലഗ്രാം നീക്കിയതായും ആപ്പിളിനോടും സമാന നടപടി സ്വീകരിക്കാന് കേന്ദ്രം നിര്ദേശിച്ചതായും റിപ്പോര്ട്ടുകള്. ജൂണ് 22 വരെ ഇന്ത്യയില് ടെലഗ്രാമിലേക്കുള്ള പ്രവേശനം നിയന്ത്രിച്ചിരിക്കുകയാണ്.
നീറ്റ് പരീക്ഷയുടെ പുനഃപരീക്ഷ ജൂണ് 21-ന് നടക്കാനിരിക്കെയാണ് കേന്ദ്ര സര്ക്കാര് നടപടി. ചോദ്യപേപ്പര് ചോര്ച്ചയെന്ന വ്യാജപ്രചാരണങ്ങള്, പരീക്ഷാ തട്ടിപ്പുകള്, സാമ്പത്തിക വഞ്ചനകള് എന്നിവയ്ക്കായി ടെലഗ്രാം വ്യാപകമായി ഉപയോഗിക്കപ്പെട്ടതായി കണ്ടെത്തിയതിനെ തുടര്ന്നാണ് നിയന്ത്രണം ഏര്പ്പെടുത്തിയതെന്ന് ദേശീയ പരീക്ഷാ ഏജന്സിയും കേന്ദ്ര സര്ക്കാരും വ്യക്തമാക്കുന്നു.
‘പേപ്പര് ലീക്ക്ഡ് നീറ്റ്’, ‘റീ-നീറ്റ് 2026’, ‘പ്രൈവറ്റ് മാഫിയ’, ‘റീ-നീറ്റ് മാഫിയ’ തുടങ്ങിയ പേരുകളിലുള്ള ടെലഗ്രാം ചാനലുകള് വഴി ചോദ്യപേപ്പറുകള് ലഭ്യമാണെന്ന് അവകാശപ്പെട്ട് പണം തട്ടിയ സംഭവങ്ങളും അന്വേഷണ ഏജന്സികള് കണ്ടെത്തിയിട്ടുണ്ട്. നിരവധി ചാനലുകളും ബോട്ടുകളും ഇതിനോടകം നീക്കം ചെയ്തിട്ടുണ്ട്.
അതേസമയം, ടെലഗ്രാമിന്റെ മെസേജ് എഡിറ്റിംഗ് ഫീച്ചര് ജൂണ് 30 വരെ ഇന്ത്യയില് പ്രവര്ത്തനരഹിതമാക്കാന് നിര്ദേശം നല്കിയിട്ടുണ്ട്. ഈ സൗകര്യം ദുരുപയോഗം ചെയ്ത് വ്യാജ ‘പേപ്പര് ലീക്ക്’ തെളിവുകള് സൃഷ്ടിച്ചിരുന്നുവെന്നാണ് അന്വേഷണ ഏജന്സികളുടെ കണ്ടെത്തല്.
നടപടിക്കെതിരെ ടെലഗ്രാം സ്ഥാപകന് Pavel Durov രംഗത്തെത്തി. അടിസ്ഥാന പ്രശ്നങ്ങള് പരിഹരിക്കാതെ ലക്ഷക്കണക്കിന് സാധാരണ ഉപയോക്താക്കളെ ബാധിക്കുന്ന നടപടിയാണിതെന്നും, ഇത്തരം പ്രവര്ത്തനങ്ങള് മറ്റ് പ്ലാറ്റ്ഫോമുകളിലേക്ക് മാറുകയാണെന്നും അദ്ദേഹം പ്രതികരിച്ചു.
ബിഹാര്, ഗുജറാത്ത്, രാജസ്ഥാന് ഉള്പ്പെടെയുള്ള സംസ്ഥാനങ്ങളില് അന്വേഷണം തുടരുകയാണെന്നും സൈബര് തട്ടിപ്പുകള് 1930 ഹെല്പ്ലൈന് നമ്പറില് റിപ്പോര്ട്ട് ചെയ്യണമെന്നും കേന്ദ്ര ഏജന്സികള് നിര്ദേശിച്ചു.
