കരിപ്പൂർ വിമാനത്താവള പരിസരത്ത് വീണ്ടും സ്വർണ്ണക്കടത്ത്-പൊട്ടിക്കൽ സംഘങ്ങൾ സജീവമാകുന്നെന്ന സൂചനകളെത്തുടർന്ന് പോലീസ് അന്വേഷണം ഊർജ്ജിതമാക്കി. സംശയാസ്പദമായ സാഹചര്യത്തിൽ വിമാനത്താവള പരിസരത്തുനിന്ന് രണ്ട് വ്യത്യസ്ത സംഘങ്ങളിലായി 13 പേരെ കരിപ്പൂർ പോലീസ് കസ്റ്റഡിയിലെടുത്തു. പ്രതികൾ സഞ്ചരിച്ചിരുന്ന രണ്ട് കാറുകളും രണ്ട് ഇരുചക്രവാഹനങ്ങളും പോലീസ് സംഘം പിടിച്ചെടുത്തിട്ടുണ്ട്.
വിമാനത്താവളത്തിന്റെ പാർക്കിങ് ഏരിയയിൽ സംശയകരമായ സാഹചര്യത്തിൽ നിലയുറപ്പിച്ച ഇവരെ നിരീക്ഷിച്ച ശേഷമാണ് പോലീസ് വലയിലാക്കിയത്. വിദേശത്തുനിന്ന് നിയമവിരുദ്ധമായി സ്വർണവുമായി എത്തുന്ന കാരിയർമാരെ വഴിയിൽവെച്ച് തട്ടിക്കൊണ്ടുപോയി സ്വർണം കവർച്ച ചെയ്യുകയായിരുന്നു തങ്ങളുടെ ലക്ഷ്യമെന്ന് പിടിയിലായവർ ചോദ്യം ചെയ്യലിൽ പോലീസിനോട് സമ്മതിച്ചിട്ടുണ്ട്. വിമാനത്താവളത്തിന് പുറത്ത് സ്വർണ്ണം കവരുന്ന സംഘങ്ങൾ വീണ്ടും വലവിരിക്കുന്നു എന്ന ഇന്റലിജൻസ് വിവരങ്ങളുടെ അടിസ്ഥാനത്തിൽ മേഖലയിൽ പോലീസ് നിരീക്ഷണം ശക്തമാക്കിയിരുന്നു.
അതേസമയം, കരിപ്പൂർ വിമാനത്താവളത്തിൽ ഇറങ്ങിയ മലപ്പുറം സ്വദേശിയായ യാത്രക്കാരനെ പെട്ടെന്ന് കാണാതായെന്ന പരാതിയും ഇതേ സമയത്ത് പോലീസിന് ലഭിച്ചിട്ടുണ്ട്. ഈ കാണാതാകലിന് പിന്നിൽ ഇപ്പോൾ പിടിയിലായ സ്വർണ്ണം പൊട്ടിക്കൽ സംഘങ്ങൾക്ക് വല്ല പങ്കുമുണ്ടോ എന്ന കാര്യവും പോലീസ് അതീവ ഗൗരവത്തോടെയാണ് അന്വേഷിക്കുന്നത്. പിടിയിലായ പ്രതികളെ കേന്ദ്രീകരിച്ച് സ്വർണ്ണക്കടത്ത് ക്വട്ടേഷൻ സംഘങ്ങളുടെ കൂടുതൽ കണ്ണികളെ കണ്ടെത്താനുള്ള ഊർജ്ജിതമായ നീക്കത്തിലാണ് കരിപ്പൂർ പോലീസ്.
