കൊച്ചി: സംസ്ഥാനത്ത് വെസ്റ്റ് നൈൽ പനി ബാധിച്ച് ഒരു മരണം കൂടി റിപ്പോർട്ട് ചെയ്തു. എറണാകുളം ആലുവ സ്വദേശി മുരളീധരൻ (60) ആണ് കളമശ്ശേരി മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ മരണമടഞ്ഞത്. സംസ്ഥാനത്ത് ഒരാഴ്ചയ്ക്കിടെ വെസ്റ്റ് നൈൽ പനി മൂലമുണ്ടാകുന്ന രണ്ടാമത്തെ മരണമാണിത്. ജില്ലയിൽ വെസ്റ്റ് നൈൽ ഭീതിക്കൊപ്പം തന്നെ മറ്റ് പകർച്ചപനികളും പടർന്നുപിടിക്കുന്നത് ആരോഗ്യവകുപ്പിനെ ആശങ്കയിലാക്കുന്നുണ്ട്.
ക്യൂലക്സ് (Culex) വിഭാഗത്തിൽപ്പെട്ട കൊതുകുകൾ പരത്തുന്ന മാരകമായ ഒരു വൈറസ് രോഗമാണ് വെസ്റ്റ് നൈൽ. 1937-ൽ ആഫ്രിക്കൻ രാജ്യമായ ഉഗാണ്ടയിലാണ് ഈ വൈറസിനെ ആദ്യമായി ശാസ്ത്രലോകം കണ്ടെത്തിയത്. കേരളത്തിൽ 2011-ൽ ആലപ്പുഴ ജില്ലയിലാണ് ആദ്യമായി വെസ്റ്റ് നൈൽ പനി സ്ഥിരീകരിക്കുന്നത്.
കടുത്ത തലവേദന, പനി, പേശിവേദന, തലചുറ്റൽ, ഓർമ്മക്കുറവ് എന്നിവയാണ് ഈ രോഗത്തിന്റെ പ്രധാന ലക്ഷണങ്ങൾ. എന്നാൽ പലരിലും പ്രാരംഭ ഘട്ടത്തിൽ പ്രകടമായ രോഗലക്ഷണങ്ങൾ ഒന്നും തന്നെ കാണിക്കാറില്ലെന്നത് രോഗനിർണ്ണയം സങ്കീർണ്ണമാക്കുന്നു. ചില രോഗികളിൽ പനിക്കും തലവേദനയ്ക്കും ഒപ്പം ഛർദ്ദി, ശരീരത്തിൽ ചൊറിഞ്ഞുതടിക്കൽ എന്നിവയും കണ്ടുവരാറുണ്ട്.
നിലവിൽ വെസ്റ്റ് നൈൽ പനിക്ക് കൃത്യമായ ആന്റിവൈറൽ ചികിത്സയോ പ്രതിരോധ വാക്സിനുകളോ ലഭ്യമല്ല. രോഗലക്ഷണങ്ങൾക്ക് നൽകുന്ന ചികിത്സ മാത്രമാണ് ഇപ്പോൾ ലഭ്യമായിട്ടുള്ളത്. അതിനാൽ തന്നെ കൊതുകുകടി ഏൽക്കാതിരിക്കാൻ വ്യക്തിഗത പ്രതിരോധ മാർഗ്ഗങ്ങൾ സ്വീകരിക്കുകയും കൊതുക് പ്രജനനം തടയുകയുമാണ് ഏറ്റവും ഫലപ്രദമായ പോംവഴി. പനി ബാധിച്ചാൽ യാതൊരു കാരണവശാലും സ്വയംചികിത്സയ്ക്ക് മുതിരരുതെന്നും, അത് രോഗാവസ്ഥ കൂടുതൽ സങ്കീർണ്ണമാക്കുമെന്നും ആരോഗ്യ വിദഗ്ദ്ധർ കർശന മുന്നറിയിപ്പ് നൽകുന്നു.
