കാലിഫോർണിയ: അമേരിക്കയിൽ വധശിക്ഷയ്ക്ക് വിധിക്കപ്പെട്ട 548 തടവുകാരുടെയും ശിക്ഷ ഇളവ് ചെയ്യാൻ പദ്ധതിയുമായി കാലിഫോർണിയ ഗവർണർ ഗാവിൻ ന്യൂസം. പദ്ധതി നടപ്പിലായാൽ അമേരിക്കയുടെ ചരിത്രത്തിലെ ഏറ്റവും വലിയ വധശിക്ഷാ ഇളവായി ഇത് മാറും. വധശിക്ഷയ്ക്ക് പകരം തടവുകാർക്ക് പരോൾ അനുവദിക്കാത്ത ജീവപര്യന്തം തടവായിരിക്കും ലഭിക്കുക.
അമേരിക്കയിൽ ഏറ്റവും കൂടുതൽ വധശിക്ഷാ തടവുകാരുള്ള സംസ്ഥാനമാണ് കാലിഫോർണിയ. ഗവർണറുടെ പ്രഖ്യാപനം നടപ്പിലായാൽ രാജ്യത്താകെയുള്ള വധശിക്ഷാ തടവുകാരുടെ എണ്ണത്തിൽ ഏകദേശം 30 ശതമാനം കുറവുണ്ടാകുമെന്നാണ് വിലയിരുത്തൽ.
വ്യാഴാഴ്ച പുറത്തിറക്കിയ മൂന്ന് പേജുള്ള തുറന്ന കത്തിലൂടെയാണ് ഗാവിൻ ന്യൂസം പദ്ധതി പ്രഖ്യാപിച്ചത്. വധശിക്ഷയോടുള്ള തന്റെ എതിർപ്പ് ആവർത്തിച്ച അദ്ദേഹം, വധശിക്ഷ കാലിഫോർണിയയുടെ മൂല്യങ്ങൾക്ക് നിരക്കാത്തതാണെന്നും നിയമവ്യവസ്ഥയുടെ അടിത്തറയെ ദുർബലപ്പെടുത്തുന്നതാണെന്നും വ്യക്തമാക്കി.
ഗവർണർ പദവിയിലെ കാലാവധി അവസാനിക്കാനിരിക്കെയാണ് ന്യൂസത്തിന്റെ നിർണായക നീക്കം. മുൻ സാൻഫ്രാൻസിസ്കോ മേയറും ലെഫ്റ്റനന്റ് ഗവർണറുമായിരുന്ന ഗാവിൻ ന്യൂസം 2028ലെ ഡെമോക്രാറ്റിക് പാർട്ടിയുടെ പ്രസിഡന്റ് സ്ഥാനാർഥിയായി പരിഗണിക്കപ്പെടുമെന്ന അഭ്യൂഹങ്ങൾക്കിടെയാണ് പ്രഖ്യാപനം.
2019 മാർച്ചിൽ അധികാരമേറ്റതിന് പിന്നാലെ കാലിഫോർണിയയിൽ വധശിക്ഷ നടപ്പാക്കുന്നതിന് ന്യൂസം താൽക്കാലിക നിരോധനം ഏർപ്പെടുത്തിയിരുന്നു. റിപ്പബ്ലിക്കൻ ഗവർണറായിരുന്ന ആർനോൾഡ് ഷ്വാസ്‌നെഗറിന്റെ ഭരണകാലത്ത് 2006ലാണ് കാലിഫോർണിയയിൽ അവസാനമായി വധശിക്ഷ നടപ്പാക്കിയത്.
നിലവിൽ അമേരിക്കയിലെ 27 സംസ്ഥാനങ്ങളിൽ വധശിക്ഷ നിയമപരമാണ്. 23 സംസ്ഥാനങ്ങൾ വധശിക്ഷ പൂർണമായും നിർത്തലാക്കിയിട്ടുണ്ട്.
അതേസമയം, കാലിഫോർണിയ ഗവർണറുടെ നിലപാടിന് വിരുദ്ധമായി ഗുരുതരമായ ഫെഡറൽ കുറ്റകൃത്യങ്ങളിൽ വധശിക്ഷ നടപ്പാക്കണമെന്ന നിലപാടാണ് അമേരിക്കൻ പ്രസിഡന്റ് ഡൊണാൾഡ് ട്രംപിനുള്ളത്. ഫയറിങ് സ്ക്വാഡുകൾ ഉപയോഗിച്ചുള്ള ഫെഡറൽ വധശിക്ഷകൾ വിപുലീകരിക്കുമെന്ന് ട്രംപ് ഭരണകൂടം കഴിഞ്ഞ ഏപ്രിലിൽ വ്യക്തമാക്കിയിരുന്നു.
വധശിക്ഷ സംബന്ധിച്ച അമേരിക്കയിലെ രാഷ്ട്രീയ-നിയമ ചർച്ചകളിൽ പുതിയ വഴിത്തിരിവാകുകയാണ് കാലിഫോർണിയ ഗവർണറുടെ പ്രഖ്യാപനം.
