ശ്വാസകോശം സ്പോഞ്ച് പോലെയാണെന്നും പുകവലി അതിന് ഗുരുതരമായ ദോഷം വരുത്തുമെന്നും നമുക്കെല്ലാവർക്കും അറിയാം. എന്നാൽ പുകവലി മാത്രമല്ല, നമ്മുടെ ശ്വാസകോശത്തിന്റെ ആരോഗ്യത്തെ ബാധിക്കുന്ന മറ്റ് നിരവധി ഘടകങ്ങളുമുണ്ട്.
അന്തരീക്ഷ മലിനീകരണം ശ്വാസകോശത്തിന് വലിയ ഭീഷണിയാണ്. വാഹനങ്ങളിൽ നിന്നുള്ള പുക, പൊടി തുടങ്ങിയവ നിരന്തരം ശ്വസിക്കുന്നത് ആരോഗ്യത്തെ ബാധിക്കാം. വിട്ടുമാറാത്ത ചുമയോ ശ്വാസംമുട്ടലോ അനുഭവപ്പെട്ടാൽ അത് അവഗണിക്കരുത്. മലിനീകരണമുള്ള സാഹചര്യങ്ങളിൽ കഴിയുന്നതും മുൻകരുതലുകൾ സ്വീകരിക്കണം.
വീടിനുള്ളിലെ മലിനീകരണവും ശ്രദ്ധിക്കണം. പാചകപ്പുക, ചന്ദനത്തിരിയുടെയും മറ്റ് കത്തിക്കുന്ന വസ്തുക്കളുടെയും പുക, വെന്റിലേഷന്റെ അഭാവം, വിറക് കത്തിക്കുമ്പോഴുണ്ടാകുന്ന പുക എന്നിവ ശ്വാസകോശത്തിന് ദോഷകരമാകാം. വീടിനുള്ളിൽ ആവശ്യമായ വായുസഞ്ചാരം ഉറപ്പാക്കേണ്ടത് പ്രധാനമാണ്.
തൊഴിൽ മേഖലയിലും ജാഗ്രത വേണം. നിർമാണ മേഖല, കെമിക്കൽ ഫാക്ടറികൾ തുടങ്ങിയ ഇടങ്ങളിൽ ജോലി ചെയ്യുന്നവർ പൊടി, രാസവസ്തുക്കളിൽ നിന്നുള്ള പുക തുടങ്ങിയവയുമായി സമ്പർക്കത്തിലാകാൻ സാധ്യതയുണ്ട്. അതിനാൽ തൊഴിലിടങ്ങളിൽ നിർദേശിച്ചിട്ടുള്ള മാസ്കുകളും മറ്റ് സുരക്ഷാ സംവിധാനങ്ങളും കൃത്യമായി ഉപയോഗിക്കണം.
വ്യായാമമില്ലാത്ത ജീവിതശൈലിയും ഒഴിവാക്കണം. സ്ഥിരമായ ശാരീരിക പ്രവർത്തനങ്ങളുടെ അഭാവം ഹൃദയ-ശ്വാസകോശ ആരോഗ്യത്തെ പ്രതികൂലമായി ബാധിക്കാം. ആരോഗ്യകരമായ ജീവിതശൈലിയുടെ ഭാഗമായി കൃത്യമായ വ്യായാമം ശീലമാക്കുന്നത് ഗുണകരമാണ്.
ശ്വാസംമുട്ടൽ, വിട്ടുമാറാത്ത ചുമ, അലർജി തുടങ്ങിയ ലക്ഷണങ്ങൾ അവഗണിക്കരുത്. ആസ്മ പോലുള്ള ശ്വാസകോശ സംബന്ധമായ ബുദ്ധിമുട്ടുകളുള്ളവർ ഡോക്ടറുടെ നിർദേശപ്രകാരം കൃത്യമായ പരിശോധനകളും ചികിത്സയും തുടരേണ്ടതാണ്.
നിത്യജീവിതത്തിൽ ഉപയോഗിക്കുന്ന ഉത്പന്നങ്ങളും ശ്രദ്ധിക്കണം. ചില പെയിന്റുകൾ, പെർഫ്യൂമുകൾ, സോൾവന്റുകൾ, ഫ്ലോർ ക്ലീനറുകൾ തുടങ്ങിയവ ഉപയോഗിക്കുമ്പോൾ ശ്വാസതടസ്സമോ മറ്റ് അസ്വസ്ഥതകളോ അനുഭവപ്പെടുന്നുണ്ടെങ്കിൽ ഉപയോഗം നിർത്തി ആവശ്യമായാൽ ആരോഗ്യവിദഗ്ധരുടെ നിർദേശം തേടണം.
ശ്വാസകോശത്തിന്റെ ആരോഗ്യം സംരക്ഷിക്കാൻ പുകവലി ഒഴിവാക്കുന്നതിനൊപ്പം മലിനീകരണം കുറയ്ക്കുക, സുരക്ഷാ മുൻകരുതലുകൾ പാലിക്കുക, ആരോഗ്യകരമായ ജീവിതശൈലി പിന്തുടരുക, രോഗലക്ഷണങ്ങൾ അവഗണിക്കാതിരിക്കുക എന്നിവയും പ്രധാനമാണ്.
