പനി വന്നാൽ കുളിക്കരുത്… വീട്ടിലെ മുതിർന്നവർ പലപ്പോഴും പറയുന്ന കാര്യമാണിത്. എന്നാൽ പനി വന്നാൽ കുളിക്കുന്നത് ശരിക്കും അപകടകരമാണോ? ആരോഗ്യവിദഗ്ധരുടെ അഭിപ്രായത്തിൽ പനി ഉണ്ടെന്ന കാരണത്താൽ മാത്രം കുളി ഒഴിവാക്കേണ്ടതില്ല.
38 ഡിഗ്രി സെൽഷ്യസോ അതിൽ കൂടുതലോ ശരീര താപനില ഉയർന്നാൽ സാധാരണയായി പനിയായി കണക്കാക്കാം. അണുബാധയ്ക്കെതിരായ ശരീരത്തിന്റെ സ്വാഭാവിക പ്രതികരണമായാണ് പലപ്പോഴും പനി ഉണ്ടാകുന്നത്.
പനി ഉള്ളപ്പോൾ കുളിക്കാമെങ്കിലും വെള്ളത്തിന്റെ താപനിലയും കുളിക്കുന്ന രീതിയും ശ്രദ്ധിക്കണം. ശരീരം പെട്ടെന്ന് തണുപ്പിക്കാനായി ഐസ് വെള്ളത്തിലോ വളരെ തണുത്ത വെള്ളത്തിലോ കുളിക്കുന്നത് ഒഴിവാക്കുന്നതാണ് നല്ലത്. തണുത്ത വെള്ളം വിറയലിന് കാരണമാകുകയും ശരീരത്തിന്റെ ആന്തരിക താപനില ഉയരാൻ ഇടയാക്കുകയും ചെയ്യാം.
അപ്പോൾ എങ്ങനെയുള്ള വെള്ളത്തിലാണ് കുളിക്കേണ്ടത്?
വളരെ ചൂടോ തണുപ്പോ ഇല്ലാത്ത ഇളംചൂടുവെള്ളം ഉപയോഗിക്കാം. ഇത് ശരീരത്തിലെ അസ്വസ്ഥത കുറയ്ക്കാൻ സഹായിച്ചേക്കാം. എന്നാൽ കുളിക്കുന്നത് പനിയുടെ യഥാർഥ കാരണം മാറ്റുന്നില്ല. വൈറൽ അണുബാധ മൂലമുള്ള പനിയാണെങ്കിൽ കുളിച്ചതുകൊണ്ട് അണുബാധ മാറില്ല.
പനി ഉള്ളപ്പോൾ കട്ടിയുള്ള വസ്ത്രങ്ങളും പുതപ്പുകളും ഉപയോഗിച്ച് ശരീരം അമിതമായി ചൂടാക്കുന്നതും ഒഴിവാക്കണം. കട്ടികുറഞ്ഞ വസ്ത്രങ്ങൾ ധരിക്കുകയും മുറിയിൽ സുഖകരമായ താപനില നിലനിർത്തുകയും ചെയ്യാം.
കുളിക്കുമ്പോൾ ഏറെ നേരം വെള്ളത്തിൽ തുടരാതിരിക്കുക. കുളിച്ച ശേഷം ശരീരം നന്നായി തുടച്ച് ഉണങ്ങിയ വസ്ത്രം ധരിക്കണം. വിറയൽ, തലകറക്കം, അമിതമായ ക്ഷീണം എന്നിവ അനുഭവപ്പെട്ടാൽ ഉടൻ കുളി നിർത്തണം.
പനി ഉള്ളപ്പോൾ കുളിക്കുന്നതിനെക്കാൾ പ്രധാനമാണ് ശരിയായ വിശ്രമവും ആവശ്യത്തിന് ദ്രാവകങ്ങൾ കഴിക്കുന്നതും. വെള്ളം, സൂപ്പ് തുടങ്ങിയ ദ്രാവകങ്ങൾ ധാരാളമായി കുടിക്കണം. ഡോക്ടറുടെ നിർദേശമില്ലാതെ ആന്റിബയോട്ടിക്കുകൾ കഴിക്കരുത്.
പനി തുടരുകയോ കൂടുകയോ ചെയ്താൽ വൈദ്യസഹായം തേടണം. ശ്വാസതടസം, നെഞ്ചുവേദന, ശക്തമായ തലവേദന, ആശയക്കുഴപ്പം, തുടർച്ചയായ ഛർദി, നിർജലീകരണത്തിന്റെ ലക്ഷണങ്ങൾ, ശരീരത്തിൽ അസാധാരണമായ പാടുകളോ ചൊറിച്ചിലോ ഉണ്ടാകുകയാണെങ്കിൽ ഉടൻ ഡോക്ടറെ കാണേണ്ടതാണ്.
അതിനാൽ, പനി വന്നാൽ കുളിക്കരുതെന്നത് നിർബന്ധമായ നിയമമില്ല. ഇളംചൂടുവെള്ളത്തിൽ, അധികനേരം എടുക്കാതെ കുളിക്കാം. എന്നാൽ വിശ്രമത്തിനും വെള്ളം കുടിക്കുന്നതിനുമാണ് കൂടുതൽ പ്രാധാന്യം.
