ഫിഫ ലോകകപ്പിൽ ബ്രസീലിന് ആദ്യ ജയം. മറുപടിയില്ലാത്ത മൂന്ന് ഗോളിന് ഹെയ്തിയെ തോൽപ്പിച്ചാണ് ബ്രസീൽ വിജയവഴിയിലേക്ക് തിരിച്ചെത്തിയത്. മത്തെയോസ് കൂന്യയുടെ ഇരട്ടഗോളും വിനീഷ്യസ് ജൂനിയറിന്റെ ഗോളുമാണ് ബ്രസീലിന്റെ ജയം എളുപ്പമാക്കിയത്.
ആദ്യ മത്സരത്തിലെ സമനിലയുടെ നിരാശ മറികടക്കാൻ ഇറങ്ങിയ ബ്രസീൽ തുടക്കം മുതൽ ആക്രമണ ഫുട്ബോൾ പുറത്തെടുത്തു. മത്സരത്തിന്റെ 23-ാം മിനിറ്റിൽ മത്തെയോസ് കൂന്യയാണ് ബ്രസീലിനെ മുന്നിലെത്തിച്ചത്. 36-ാം മിനിറ്റിൽ വീണ്ടും വലകുലുക്കിയ കൂന്യ ബ്രസീലിന്റെ ലീഡ് ഇരട്ടിയാക്കി.
ആദ്യ പകുതി അവസാനിക്കാൻ നിമിഷങ്ങൾ മാത്രം ബാക്കി നിൽക്കെ വിനീഷ്യസ് ജൂനിയറും ഗോൾ പട്ടികയിൽ ഇടം നേടി. ഇൻജുറി ടൈമിൽ നേടിയ ഗോളോടെ ആദ്യ പകുതി അവസാനിക്കുമ്പോൾ ബ്രസീൽ മൂന്ന് ഗോളിന്റെ സുരക്ഷിത ലീഡിലായിരുന്നു.
രണ്ടാം പകുതിയിൽ ചില മാറ്റങ്ങളുമായി ഇറങ്ങിയ ബ്രസീൽ കൂടുതൽ ഗോളുകൾക്കായി ശ്രമിച്ചെങ്കിലും ഫിനിഷിംഗിൽ വിജയിക്കാനായില്ല. മറുവശത്ത് ഹെയ്തിയും തിരിച്ചടിക്കാൻ ശ്രമിച്ചു. 63-ാം മിനിറ്റിൽ ഗോൾ നേടാനുള്ള മികച്ച അവസരം ഹെയ്തിക്ക് ലഭിച്ചെങ്കിലും റിക്കാർഡോ ആഡെയുടെ ഹെഡർ ബ്രസീൽ ഗോൾകീപ്പർ അലിസൺ മനോഹരമായി രക്ഷപ്പെടുത്തി.
മത്സരാവസാനം വരെ ലീഡ് നിലനിർത്തിയ ബ്രസീൽ മൂന്ന് ഗോളിന്റെ തകർപ്പൻ ജയത്തോടെ ടൂർണമെന്റിലെ ആദ്യ വിജയം സ്വന്തമാക്കി.




