കാസർഗോഡ് എണ്ണപ്പാറയിൽ സി.പി.ഐ.എം. ലോക്കൽ കമ്മിറ്റി ഓഫീസിന് നേരെ ആക്രമണം. തായന്നൂർ ലോക്കൽ കമ്മിറ്റി ഓഫീസിന് നേരെയാണ് അർധരാത്രിയോടെ ആക്രമണമുണ്ടായത്.
ആക്രമണത്തിൽ ഓഫീസിന്റെ ജനൽചില്ലുകളും കൊടിമരവും തകർത്തു. സംഭവത്തിന് പിന്നിൽ ബി.ജെ.പി. പ്രവർത്തകരാണെന്ന് സി.പി.ഐ.എം. ആരോപിച്ചു.
ഇന്നലെ രാത്രിയോടെയാണ് ആക്രമണം നടന്നതെന്നാണ് പൊലീസിന്റെ പ്രാഥമിക നിഗമനം. സംഭവത്തിൽ അന്വേഷണം ആരംഭിച്ച പൊലീസ് സമീപത്തെ സി.സി.ടി.വി. ദൃശ്യങ്ങൾ ശേഖരിച്ച് പരിശോധന നടത്തുകയാണ്.
പ്രദേശത്ത് രാഷ്ട്രീയ സംഘർഷങ്ങളൊന്നും നിലവിലില്ലെന്നും ബോധപൂർവം സംഘർഷാവസ്ഥ സൃഷ്ടിക്കാനുള്ള ശ്രമമാണ് ആക്രമണത്തിന് പിന്നിലെന്നുമാണ് സി.പി.ഐ.എം. ആരോപണം. സംഭവത്തിൽ പൊലീസ് അന്വേഷണം തുടരുകയാണ്.
