വയനാട് പുൽപ്പള്ളിയിൽ മദ്യലഹരിയിലുണ്ടായ തർക്കത്തിനിടെ ഒരാൾ വെട്ടേറ്റ് മരിച്ച സംഭവത്തിൽ രണ്ട് പേർ അറസ്റ്റിൽ. ചേകാടി തോണിക്കടവ് ടി.എസ്. ശേഖരൻ, തമിഴ്നാട് നാഗപട്ടണം സ്വദേശി പനീർശെൽവം കാതൻ എന്നിവരെയാണ് പുൽപ്പള്ളി പൊലീസ് അറസ്റ്റ് ചെയ്തത്.
താമരശ്ശേരി മലപുറം അപ്പുറത്ത് പൊയിൽ ലൈജുവാണ് മരിച്ചത്. ലൈജുവിന്റെ സുഹൃത്ത് കൊല്ലം സ്വദേശി ഷഫീഖിന് ഗുരുതരമായി പരിക്കേറ്റിട്ടുണ്ട്. ഷഫീഖ് കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലാണ്.
മൂന്നാം തീയതി രാത്രി ഒൻപതോടെയാണ് ആനപ്പാറയിലെ ക്വാർട്ടേഴ്സിൽ മദ്യലഹരിയിൽ സംഘർഷമുണ്ടായത്. ലൈജുവും ഷഫീഖും താമസിച്ചിരുന്ന ക്വാർട്ടേഴ്സിൽ എത്തിയ പ്രതികൾ വെട്ടുകത്തി ഉപയോഗിച്ച് ഇരുവരെയും ആക്രമിക്കുകയായിരുന്നു.
ഗുരുതരമായി പരിക്കേറ്റ ലൈജു പിറ്റേന്ന് മരണപ്പെട്ടു. സംഭവത്തിൽ പുൽപ്പള്ളി പൊലീസ് അന്വേഷണം തുടരുകയാണ്.
