മുത്തങ്ങ അതിർത്തിയിൽ വാഹന പരിശോധനയ്ക്കിടെ കേരള പൊലീസിന്റെ ജാഗ്രതയിൽ എംഡിഎംഎ കടത്ത് പിടിയിൽ. ഒരു സ്കൂട്ടറിൽ ട്രിപ്പിൾ യാത്ര ചെയ്തെത്തിയ കോഴിക്കോട് സ്വദേശികളായ മൂന്ന് യുവാക്കളെയാണ് മാരക മയക്കുമരുന്നുമായി അറസ്റ്റ് ചെയ്തത്.
കർണാടക-കേരള അതിർത്തിയായ മുത്തങ്ങയിൽ വാഹന പരിശോധനയ്ക്കിടെയാണ് ജില്ലാ ലഹരിവിരുദ്ധ സ്ക്വാഡും ബത്തേരി പൊലീസും ചേർന്ന് മൂന്ന് യുവാക്കളെ എംഡിഎംഎയുമായി പിടികൂടിയത്.
ഒരു സ്കൂട്ടറിൽ മൂന്ന് പേർ സഞ്ചരിക്കുന്നത് ശ്രദ്ധയിൽപ്പെട്ട പൊലീസ് വാഹനം തടഞ്ഞ് പരിശോധിക്കുന്നതിനിടെയാണ് മൊബൈൽ ഹോൾഡറിൽ സൂക്ഷിച്ചിരുന്ന ഒസിബി പേപ്പർ ഉദ്യോഗസ്ഥരുടെ ശ്രദ്ധയിൽപ്പെടുന്നത്. മയക്കുമരുന്ന് ഉപയോഗിക്കുന്നവർ സാധാരണ കൈവശം വയ്ക്കുന്ന ഈ പേപ്പർ കണ്ടതോടെ വിശദമായ ദേഹപരിശോധന നടത്തുകയായിരുന്നു.
തുടർന്നുള്ള പരിശോധനയിൽ 3.67 ഗ്രാം എംഡിഎംഎ കണ്ടെത്തി. കോഴിക്കോട് സ്വദേശികളായ മുഹമ്മദ് സിരേഷ് (23), എം. ജിതേന്ദ്രദാസ് (25), പി. അജുൽ (22) എന്നിവരെയാണ് അറസ്റ്റ് ചെയ്തത്.
ഗുണ്ടൽപേട്ട ഭാഗത്തുനിന്ന് കെ.എൽ. 57 എ.ഡി. 9903 നമ്പർ സ്കൂട്ടറിലായിരുന്നു ഇവരുടെ യാത്ര. അതിർത്തിയിൽ പൊലീസ്-എക്സൈസ് പരിശോധന ശക്തമാണെന്ന് അറിഞ്ഞിട്ടും ട്രിപ്പിൾ യാത്രയായി കേരളത്തിലേക്ക് എത്തുകയായിരുന്നുവെന്ന് പൊലീസ് അറിയിച്ചു. പ്രതികൾ സഞ്ചരിച്ച സ്കൂട്ടറും പൊലീസ് കസ്റ്റഡിയിലെടുത്തു.
എസ്.ഐ. ജസ്വിൻ ജോയ്, എ.എസ്.ഐമാരായ ശ്യാം ലാൽ, വിപിൻ കുമാർ, സീനിയർ സിവിൽ പൊലീസ് ഓഫീസർ ലബ്നാസ്, സിവിൽ പൊലീസ് ഓഫീസർമാരായ റോബിൻ പൗലോസ്, നിത്യ എന്നിവരടങ്ങിയ സംഘമാണ് പ്രതികളെ പിടികൂടിയത്.
