ഇടുക്കി: കക്കൂസ് മാലിന്യം കലർന്ന മലിനജലം ജലസ്രോതസ്സിലേക്ക് ഒഴുക്കിയ സംഭവത്തിൽ ഇടുക്കി നെടുങ്കണ്ടത്ത് കെട്ടിട ഉടമയ്ക്ക് 50,000 രൂപ പിഴ. ജില്ലാ എൻഫോഴ്‌സ്‌മെന്റ് സ്ക്വാഡും നെടുങ്കണ്ടം ഗ്രാമപഞ്ചായത്തും സംയുക്തമായി നടത്തിയ പരിശോധനയിലാണ് നിയമലംഘനം കണ്ടെത്തിയത്.
നെടുങ്കണ്ടം സെൻട്രൽ ജംഗ്ഷനിൽ ചൈതന്യ റോഡിന് സമീപമുള്ള വിജയൻ മേപ്പുറത്ത് എന്നയാളുടെ ഉടമസ്ഥതയിലുള്ള കെട്ടിടത്തിൽ നിന്നാണ് മലിനജലം പുറത്തേക്ക് ഒഴുക്കിയിരുന്നത്. കെട്ടിടത്തോട് ചേർന്നുള്ള കുഴിയിൽ നിന്ന് മോട്ടോർ ഉപയോഗിച്ച് കറുത്ത നിറത്തിലുള്ള ദുർഗന്ധം വമിക്കുന്ന മലിനജലം തുറന്ന ഓടയിലേക്ക് പമ്പ് ചെയ്ത് ഒഴുക്കുന്നതായാണ് പരിശോധനയിൽ കണ്ടെത്തിയത്.
കെട്ടിടത്തിലെ ശുചിമുറികളിൽ നിന്നുള്ള കക്കൂസ് മാലിന്യം കലർന്ന മലിനജലമാണിതെന്ന് പ്രാഥമിക പരിശോധനയിൽ വ്യക്തമായി. ശാസ്ത്രീയ സംസ്കരണമില്ലാതെ മലിനജലം പൊതുജലസ്രോതസ്സിലേക്ക് ഒഴുക്കുന്നത് ഗുരുതരമായ പരിസ്ഥിതി മലിനീകരണത്തിനും പൊതുജനാരോഗ്യ പ്രശ്നങ്ങൾക്കും കാരണമാകുമെന്ന് എൻഫോഴ്‌സ്‌മെന്റ് സ്ക്വാഡ് വിലയിരുത്തി.
മലിനജലം അംഗീകൃത സെപ്റ്റേജ് ടാങ്കറുകൾ വഴി നീക്കം ചെയ്ത് സംസ്കരണ കേന്ദ്രങ്ങളിൽ എത്തിക്കേണ്ടതിന് പകരം തുറന്ന ഓടയിലേക്ക് ഒഴുക്കിയ നടപടി ഗുരുതരമായ നിയമലംഘനമാണെന്ന് കണ്ടെത്തിയതിനെ തുടർന്നാണ് നടപടി. കെട്ടിട ഉടമയ്ക്ക് 50,000 രൂപ പിഴ ചുമത്തുന്നതിനും തുടർ നിയമനടപടികൾ സ്വീകരിക്കുന്നതിനും ഗ്രാമപഞ്ചായത്ത് സെക്രട്ടറിക്ക് ശുപാർശ നൽകി.
