ഇടുക്കിയിൽ മഴയുടെ ശക്തി കുറഞ്ഞെങ്കിലും ജാഗ്രത തുടരുകയാണ്. ജില്ലയിൽ ഇപ്പോൾ ഇടവിട്ടാണ് മഴ ലഭിക്കുന്നത്. എന്നാൽ കഴിഞ്ഞ ദിവസങ്ങളിലെ കനത്ത മഴയെ തുടർന്ന് നീരൊഴുക്ക് ശക്തമായ സാഹചര്യത്തിൽ നാല് അണക്കെട്ടുകളുടെ ഷട്ടറുകൾ തുറന്ന് വെള്ളം ഒഴുക്കുകയാണ്. കല്ലാർകുട്ടി, കല്ലാർ, പാംബ്ല, മലങ്കര ഡാമുകളാണ് തുറന്നത്.
ജില്ലയിലെ പ്രധാന അണക്കെട്ടുകളിലെ ജലനിരപ്പ് ഉയരുന്നുണ്ട്. ഇടുക്കി അണക്കെട്ടിൽ ഇന്നലെ മാത്രം ഒമ്പത് അടി വെള്ളമാണ് ഉയർന്നത്. നിലവിൽ ജലനിരപ്പ് 2339.62 അടിയിലെത്തിയിട്ടുണ്ട്. അതേസമയം, മുല്ലപ്പെരിയാർ അണക്കെട്ടിലെ ജലനിരപ്പ് 116.7 അടിയാണ്.
മലയോര മേഖലകളിൽ മണ്ണിടിച്ചിൽ ഭീഷണി നിലനിൽക്കുന്നതിനാൽ ജാഗ്രതാ നിർദേശം തുടരുകയാണ്. വിനോദസഞ്ചാര കേന്ദ്രങ്ങളിലേക്കുള്ള പ്രവേശന വിലക്കും രാത്രി യാത്രാ നിരോധനവും നിലവിലുണ്ട്.
കുമളി–പൂപ്പാറ സംസ്ഥാനപാതയിൽ പുളിയൻമലയ്ക്ക് സമീപം റോഡിലേക്ക് വീണ മരം മുറിച്ചുനീക്കുന്ന പ്രവർത്തനങ്ങൾ അവസാനഘട്ടത്തിലാണ്. ജില്ലയുടെ വിവിധ ഭാഗങ്ങളിൽ ശക്തമായ കാറ്റും അനുഭവപ്പെട്ടു.
കനത്ത മഴയിലും കാറ്റിലും ഇന്നലെ മാത്രം 14 വീടുകൾക്ക് നാശനഷ്ടമുണ്ടായി. നിലവിൽ ഏഴ് ദുരിതാശ്വാസ ക്യാമ്പുകളിലായി 101 പേരെ താമസിപ്പിച്ചിട്ടുണ്ട്. മഴയുടെ ശക്തി കുറഞ്ഞെങ്കിലും ദുരന്തസാധ്യത പൂർണമായി ഒഴിഞ്ഞിട്ടില്ലാത്തതിനാൽ അധികൃതർ ജാഗ്രത തുടരണമെന്ന് നിർദേശിച്ചു.




