ഇന്ത്യൻ സിനിമയിലെ ശ്രദ്ധേയനായ നടൻ ഫഹദ് ഫാസിലും, ‘ബാഹുബലി’യിലൂടെ ലോകശ്രദ്ധ നേടിയ ആർക്കാ മീഡിയ വർക്ക്സും, സംവിധായകൻ എസ്.എസ്. രാജമൗലിയും ഒന്നിക്കുന്ന ബിഗ് ബജറ്റ് ഫാന്റസി എന്റർടെയിനർ ‘ഡോൺട്ട് ട്രബിൾ ദ ട്രബിൾ’ എന്ന ചിത്രത്തിന്റെ ടീസർ പുറത്തിറങ്ങി.
ഷോവിങ് ബിസിനസ്സ് ബാനറിൽ എസ്.എസ്. കാർത്തികേയ, ഷോബു യാർലഗഡ്ഡ, പ്രസാദ് ദേവിനേനി എന്നിവർ ചേർന്നാണ് ചിത്രം നിർമ്മിക്കുന്നത്. നവാഗതനായ ശശാങ്ക് യെലേട്ടിയാണ് ചിത്രം സംവിധാനം ചെയ്യുന്നത്.
ഫാന്റസി, ഹ്യൂമർ, ഹൃദയസ്പർശിയായ മുഹൂർത്തങ്ങൾ എന്നിവ കോർത്തിണക്കിയ വ്യത്യസ്തമായ സിനിമാനുഭവമാണ് ചിത്രം വാഗ്ദാനം ചെയ്യുന്നത്.
ചിത്രത്തിന്റെ അണിയറപ്രവർത്തകരുടെ സാന്നിധ്യത്തിൽ നടന്ന ചടങ്ങിലാണ് ടീസർ പുറത്തിറക്കിയത്. ഒരു കൊച്ചു പെൺകുട്ടിക്കായി മാജിക് അവതരിപ്പിക്കുന്ന ഫഹദ് ഫാസിലിലൂടെയാണ് ടീസർ ആരംഭിക്കുന്നത്. ഇരുവരും തമ്മിലുള്ള രസകരവും ഹൃദയസ്പർശിയുമായ നിമിഷങ്ങളാണ് ടീസറിന്റെ പ്രധാന ആകർഷണം.
ഒരു വലിയ മാജിക്കിലൂടെ പെൺകുട്ടിയെ അപ്രത്യക്ഷയാക്കാമെന്ന് ഫഹദ് പറയുന്നതോടെ കഥയിൽ അപ്രതീക്ഷിത സംഭവങ്ങൾ അരങ്ങേറുന്നതാണ് ടീസർ സൂചിപ്പിക്കുന്നത്. ഫഹദ് ഫാസിലിന്റെ വ്യത്യസ്തമായ കഥാപാത്രാവതരണവും ബാലതാരത്തിന്റെ പ്രകടനവും ശ്രദ്ധ നേടുകയാണ്.
കാല ഭൈരവ ഒരുക്കിയ പശ്ചാത്തല സംഗീതവും മികച്ച ഛായാഗ്രഹണവും ടീസറിന്റെ മികവ് വർധിപ്പിക്കുന്നു.
‘ഡോൺട്ട് ട്രബിൾ ദ ട്രബിൾ’ 2026 സെപ്റ്റംബർ 11-ന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും. ചിത്രവുമായി ബന്ധപ്പെട്ട കൂടുതൽ വിവരങ്ങൾ അണിയറ പ്രവർത്തകർ ഉടൻ പുറത്തുവിടും.
