തിരുവനന്തപുരം: ബാർ ലൈസൻസ് വിവാദങ്ങൾക്കൊടുവിൽ എക്സൈസ് കമ്മിഷണർ സീറാം സാംബശിവറാവുവിനെ സ്ഥാനത്തുനിന്ന് മാറ്റി. നെടുമ്പാശേരി വിമാനത്താവളത്തിൽ പുതിയ ബാർ ലൈസൻസ് അനുവദിച്ചതും മൂന്ന് ബിയർ-വൈൻ പാർലറുകൾക്ക് ബാർ പദവി നൽകിയതുമായി ബന്ധപ്പെട്ട വിവാദങ്ങളാണ് നടപടിക്ക് പിന്നിൽ.
ബാർ ലൈസൻസ് അനുവദിക്കുന്നതിലും ഉദ്യോഗസ്ഥരെ പിന്തുണച്ചതിലും എക്സൈസ് മന്ത്രി എം. ലിജു കടുത്ത അതൃപ്തി പ്രകടിപ്പിച്ചിരുന്നു. നെടുമ്പാശേരി വിമാനത്താവളത്തിൽ രണ്ട് ബാർ ലൈസൻസുകൾ അനുവദിച്ച കാര്യം സർക്കാരിനെ അറിയിക്കേണ്ടതായിരുന്നുവെന്നും മന്ത്രി വ്യക്തമാക്കിയിരുന്നു. വകുപ്പിന്റെ പ്രവർത്തനരീതിയിൽ മാറ്റങ്ങളുണ്ടാകുമെന്നും മന്ത്രി മുന്നറിയിപ്പ് നൽകിയിരുന്നു.
എക്സൈസ് വകുപ്പിൽ മന്ത്രിയുടെ അറിവില്ലാതെ തുടർച്ചയായി ഉദ്യോഗസ്ഥ തലത്തിൽ തീരുമാനങ്ങളുണ്ടാകുന്നത് മന്ത്രിയെ പ്രതിരോധത്തിലാക്കിയിരുന്നു. വിവാദത്തിൽ മുൻ എക്സൈസ് മന്ത്രിയും വിമർശനവുമായി രംഗത്തെത്തിയിരുന്നു. അതൃപ്തി അറിയിക്കാൻ മാത്രമായി ഒരു മന്ത്രി വേണോയെന്നായിരുന്നു പരിഹാസം. എന്നാൽ എം.ബി. രാജേഷും എൽ.ഡി.എഫും ചേർന്ന് വരുത്തിവെച്ച സംവിധാനത്തോടാണ് തന്റെ അതൃപ്തിയെന്നായിരുന്നു മന്ത്രിയുടെ മറുപടി.
അതേസമയം, നിയമവിരുദ്ധമായി ഒന്നും ചെയ്തിട്ടില്ലെന്നും നിലവിലുള്ള നിയമങ്ങൾക്കും ചട്ടങ്ങൾക്കും അനുസരിച്ചാണ് നടപടികൾ സ്വീകരിച്ചതെന്നുമായിരുന്നു സീറാം സാംബശിവറാവുവിന്റെ വിശദീകരണം.
യുഡിഎഫ് സർക്കാരിന്റെ പുതിയ മദ്യനയം പ്രഖ്യാപിക്കാനിരിക്കെയാണ് എക്സൈസ് വകുപ്പിലെ നിർണായക ഉദ്യോഗസ്ഥ മാറ്റം. ഉദ്യോഗസ്ഥ നീക്കത്തിൽ മന്ത്രിസഭയ്ക്കുള്ളിലും വ്യത്യസ്ത അഭിപ്രായങ്ങൾ ഉയർന്നതായാണ് വിവരം.
ഈ മാസം 30നകം സർക്കാരിന്റെ പുതിയ മദ്യനയം പ്രഖ്യാപിച്ചേക്കുമെന്നാണ് സൂചന. പുതിയ മദ്യനയത്തിന് മുന്നോടിയായുള്ള എക്സൈസ് വകുപ്പിലെ മാറ്റങ്ങളും തീരുമാനങ്ങളും രാഷ്ട്രീയ കേന്ദ്രങ്ങളിൽ ശ്രദ്ധ നേടുകയാണ്.
