ആലപ്പുഴ: കടയിൽനിന്ന് നാല് വയസ്സുകാരന് വാങ്ങിനൽകിയ കോലുമിഠായിൽ യന്ത്രങ്ങളുടെ ബെയറിങ്ങിന് ഉപയോഗിക്കുന്ന സ്റ്റീൽ ബോൾ കണ്ടെത്തി. വലിയകലവൂർ പന്നിശ്ശേരി സ്വദേശിയുടെ മകനായി വാങ്ങിയ മിഠായിലാണ് ലോഹവസ്തു കണ്ടെത്തിയത്.
ചൊവ്വാഴ്ച വൈകിട്ട് മൂന്നുമണിയോടെ വലിയകലവൂരിന് സമീപത്തെ കടയിൽനിന്നാണ് കുട്ടിക്ക് മിഠായി വാങ്ങിനൽകിയത്. മിഠായി കഴിക്കുന്നതിനിടെ അസ്വാഭാവികത തോന്നിയ കുട്ടി രക്ഷിതാക്കളെ കാണിച്ചതോടെയാണ് സംഭവം പുറത്തറിയുന്നത്.
തുടർന്ന് രക്ഷിതാക്കൾ ശിശുക്ഷേമ സമിതിയുടെ ടോൾഫ്രീ നമ്പറിൽ പരാതി നൽകി. പരാതിയുടെ അടിസ്ഥാനത്തിൽ ഭക്ഷ്യസുരക്ഷാ വകുപ്പ് ഉദ്യോഗസ്ഥർ വീട്ടിലെത്തി മിഠായിയുടെ സാമ്പിൾ ശേഖരിച്ചു.
മിഠായി വാങ്ങിയ കടയിലും ഉദ്യോഗസ്ഥർ പരിശോധന നടത്തി. ഇതേ കമ്പനിയുടെ മറ്റ് മിഠായികളും വിതരണക്കാരുടെ വിവരങ്ങളും പരിശോധിച്ചു. മധ്യപ്രദേശ് ആസ്ഥാനമായി പ്രവർത്തിക്കുന്ന മില്ലൻ കമ്പനിയുടെ കോലുമിഠായിലാണ് സ്റ്റീൽ ബോൾ കണ്ടെത്തിയത്.
വിപണിയിൽ ലഭ്യമായ മറ്റ് മിഠായികളിലും സമാനമായ വസ്തുക്കൾ ഉണ്ടാകാമെന്ന ആശങ്കയിലാണ് രക്ഷിതാക്കൾ. സംഭവത്തിൽ ഉപഭോക്തൃ കോടതിയെ സമീപിക്കുമെന്നും കുടുംബം അറിയിച്ചു.
കുട്ടികളുടെ ആരോഗ്യത്തിന് ഭീഷണിയാകുന്ന ഇത്തരം സംഭവങ്ങളിൽ കർശന പരിശോധനയും നടപടിയും വേണമെന്ന ആവശ്യവും ഉയരുന്നുണ്ട്.
