തിരുവനന്തപുരം: പതിനാലുകാരിയെ പലതവണ ലൈംഗികമായി പീഡിപ്പിച്ച കേസിൽ 67കാരനായ വല്യച്ഛന് പത്ത് വർഷം കഠിന തടവും ഒരു ലക്ഷം രൂപ പിഴയും ശിക്ഷ വിധിച്ചു. തിരുവനന്തപുരം അതിവേഗ പ്രത്യേക കോടതിയുടേതാണ് വിധി.
പിഴ അടച്ചില്ലെങ്കിൽ രണ്ട് വർഷം അധിക തടവ് അനുഭവിക്കണമെന്നും കോടതി ഉത്തരവിട്ടു. പിഴത്തുക അതിജീവിതയ്ക്ക് നൽകണമെന്നും സർക്കാരിന്റെ ഭാഗത്തുനിന്ന് കുട്ടിക്ക് നഷ്ടപരിഹാരം നൽകണമെന്നും കോടതി നിർദേശിച്ചു.
2024 ജൂൺ 12നാണ് കേസിനാസ്പദമായ സംഭവം. പ്രതിയും അതിജീവിതയും ഒരേ വീടിന്റെ വ്യത്യസ്ത നിലകളിലായിരുന്നു താമസം. അതിജീവിതയുടെ അമ്മയുടെ സഹോദരിയുടെ ഭർത്താവാണ് പ്രതി.
ഭാര്യയുടെ പിതാവിന് ഭക്ഷണവും മരുന്നും നൽകുന്നതിനായി വീട്ടിലെത്തിയ പ്രതി, സ്കൂളിൽ പോകുന്നതിനായി ഹാളിൽ നിൽക്കുകയായിരുന്ന പെൺകുട്ടിയെ ലൈംഗികമായി അതിക്രമിക്കുകയായിരുന്നു.
ഭയന്നുപോയ കുട്ടി വിവരം ആദ്യം സുഹൃത്തിനോട് പറയുകയും തുടർന്ന് അമ്മയെയും അധ്യാപകരെയും അറിയിക്കുകയുമായിരുന്നു. തുടർന്ന് ചൈൽഡ് വെൽഫെയർ കമ്മിറ്റിയെയും പൊലീസിനെയും വിവരം അറിയിച്ചു.
പ്രതി മുമ്പും പലതവണ പീഡിപ്പിച്ചിരുന്നുവെന്നും കുടുംബങ്ങൾ തമ്മിൽ പ്രശ്നമുണ്ടാകുമെന്ന് ഭയന്ന് കുട്ടി വിവരം പുറത്തുപറഞ്ഞിരുന്നില്ലെന്നും പ്രോസിക്യൂഷൻ കോടതിയെ അറിയിച്ചു. പീഡനം ആവർത്തിച്ചതോടെയാണ് കുട്ടി വിവരം വെളിപ്പെടുത്തിയത്.
കേസിൽ പ്രോസിക്യൂഷൻ 18 സാക്ഷികളെ വിസ്തരിക്കുകയും 26 രേഖകളും ഒരു തൊണ്ടിമുതലും ഹാജരാക്കുകയും ചെയ്തു.
സ്പെഷ്യൽ പബ്ലിക് പ്രൊസിക്യൂട്ടർമാരായ അഡ്വ. ആർ.എസ്. വിജയ് മോഹനും അഡ്വ. സുരഭി പി.യും പ്രോസിക്യൂഷനുവേണ്ടി ഹാജരായി. കരമന പൊലീസ് സ്റ്റേഷൻ സബ് ഇൻസ്പെക്ടർമാരായ ശ്രീജിത്ത് വി.എസ്., വിപിൻ ആർ.എസ്. എന്നിവരാണ് കേസ് അന്വേഷിച്ചത്.
