നടനും മിമിക്രി കലാകാരനുമായ കലാഭവൻ നവാസ് ഓർമയായിട്ട് ഇന്നേക്ക് ഒരു വർഷം. നർമ്മത്തിന്റെ മേമ്പൊടി ചാലിച്ച് മൂന്ന് പതിറ്റാണ്ടിലേറെയായി ബിഗ് സ്ക്രീനിലും മിനി സ്ക്രീനിലും സ്റ്റേജ് വേദികളിലും നിറഞ്ഞുനിന്ന കലാകാരനായിരുന്നു നവാസ്.
മലയാളികളെ പൊട്ടിച്ചിരിപ്പിച്ച് തീരുംമുമ്പേ അപ്രതീക്ഷിതമായാണ് കലാഭവൻ നവാസ് വിടപറഞ്ഞത്. കലാഭവനിലൂടെ മിമിക്രി രംഗത്ത് ശ്രദ്ധേയനായ അദ്ദേഹം, 1995-ൽ ജയൻ അടിയാട്ടും ജയൻ വർക്കലയും ചേർന്ന് സംവിധാനം ചെയ്ത ചൈതന്യം എന്ന ചിത്രത്തിലൂടെയാണ് സിനിമയിലേക്ക് അരങ്ങേറ്റം കുറിച്ചത്.
1997-ൽ പുറത്തിറങ്ങിയ ജൂനിയർ മാൻഡ്രേക്ക് അദ്ദേഹത്തെ മുൻനിര ഹാസ്യതാരങ്ങളുടെ നിരയിലെത്തിച്ചു. തുടർന്ന് അമ്മ അമ്മായി അമ്മ, മാട്ടുപ്പെട്ടി മച്ചാൻ, ചന്ദാമാമ, മൈ ഡിയർ കരടി, വൺമാൻ ഷോ, വെട്ടം, ചക്കരമുത്ത്, ചട്ടമ്പിനാട് തുടങ്ങി നിരവധി ചിത്രങ്ങളിലൂടെ പ്രേക്ഷകരെ പൊട്ടിച്ചിരിപ്പിച്ചു. അദ്ദേഹത്തിന്റെതായി ഒടുവിൽ പുറത്തിറങ്ങിയ ചിത്രം ഡിറ്റക്റ്റീവ് ഉജ്ജ്വലൻ ആണ്.
ബിഗ് സ്ക്രീനിലും മിനി സ്ക്രീനിലും സ്റ്റേജ് വേദികളിലും ഒരുപോലെ തിളങ്ങിയ നവാസ്, റിയാലിറ്റി ഷോകളിൽ വിധികർത്താവായും ശ്രദ്ധേയനായി. മലയാളികളെ ചിരിയിലൂടെ കീഴടക്കിയ പ്രിയ കലാകാരൻ കലാഭവൻ നവാസിന് ഇ-ചാനലിന്റെ സ്മരണാഞ്ജലി.
