കെഎസ്ആർടിസിയിൽ വനിതകൾക്ക് സൗജന്യ യാത്രാ സൗകര്യം ലഭ്യമായതിന് പിന്നാലെ, സ്വകാര്യ ബസിൽ സ്കൂൾ വിദ്യാർത്ഥികൾക്ക് സൗജന്യ യാത്ര ഒരുക്കി ബസ് ഉടമ. എറണാകുളം പൂത്തോട്ട–കലൂർ റൂട്ടിലാണ് പുതിയ തീരുമാനം.
പൂത്തോട്ട–കലൂർ റൂട്ടിൽ സർവീസ് നടത്തുന്ന കെ പി എം ട്രാവൽസാണ് വിദ്യാർത്ഥികൾക്ക് സൗജന്യ യാത്ര പ്രഖ്യാപിച്ചത്. ബസ് ഉടമയും മർച്ചന്റ് നേവി ക്യാപ്റ്റനുമായ കെ പി പങ്കജാക്ഷൻ ആണ് ഈ തീരുമാനം എടുത്തത്.
തന്റെ ഉടമസ്ഥതയിലുള്ള ഏഴ് ബസുകളിൽ ഒന്നിലാണ് പ്രത്യേകം സ്റ്റിക്കർ പതിപ്പിച്ച് പ്ലസ് ടു വരെയുള്ള വിദ്യാർത്ഥികൾക്ക് സൗജന്യ യാത്ര അനുവദിച്ചിരിക്കുന്നത്. പ്രതിദിനം 250-ൽ അധികം വിദ്യാർത്ഥികൾ ഈ ബസിൽ യാത്ര ചെയ്യുന്നതായും അദ്ദേഹം പറഞ്ഞു.
തീരുമാനത്തിനെതിരെ എതിർപ്പുകൾ ഉണ്ടായേക്കാമെങ്കിലും പദ്ധതി തുടരുമെന്ന് ബസ് ഉടമ വ്യക്തമാക്കി. ആവശ്യമെങ്കിൽ മറ്റ് ബസുകളിലേക്കും ഇത് വ്യാപിപ്പിക്കുമെന്നും അദ്ദേഹം പറഞ്ഞു.
കെഎസ്ആർടിസിയിലെ സൗജന്യ യാത്രാ പദ്ധതികളിൽ നിന്ന് വിദ്യാർത്ഥികളെ ഒഴിവാക്കിയതിനെ വിമർശിച്ചുകൊണ്ട് എടുത്ത തീരുമാനം സർക്കാരിന് വിഷയത്തിന്റെ പ്രാധാന്യം മനസ്സിലാകാൻ സഹായിക്കട്ടെയെന്നും ബസ് ഉടമ അഭിപ്രായപ്പെട്ടു. ഇന്ന് രാവിലെ മുതൽ വിദ്യാർത്ഥികൾക്ക് സൗജന്യ യാത്ര ആരംഭിച്ചു.
