കോഴിക്കോട്: വടകര എംഡിഎംഎ കേസിലെ മൂന്നാം പ്രതി കാവ്യയ്ക്ക് ഹൈക്കോടതി ഉപാധികളോടെ ജാമ്യം അനുവദിച്ചു. സമാന സ്വഭാവമുള്ള കേസുകളിൽ മുമ്പ് പ്രതിയായിട്ടില്ലെന്നത് പരിഗണിച്ചാണ് ഹൈക്കോടതിയുടെ നടപടി.
കുറ്റകൃത്യത്തിൽ തനിക്ക് പങ്കില്ലെന്നും സുഹൃത്താണ് തന്റെ ബാങ്ക് അക്കൗണ്ട് വഴി പണമിടപാട് നടത്തിയതെന്നുമായിരുന്നു കാവ്യ കോടതിയിൽ ഉന്നയിച്ച വാദം. 58 ദിവസമായി ജയിലിൽ കഴിയുകയാണെന്നും കാവ്യയ്ക്കുവേണ്ടി ഹാജരായ അഭിഭാഷകൻ എം.പി. പ്രിയേഷ് കുമാർ കോടതിയെ അറിയിച്ചു.
കുറിച്ചിത്താനം–ചേർക്കാട് സ്വദേശിയായ കാവ്യ പേരാമ്പ്ര ബി.ആർ.സിയിലെ അധ്യാപികയായിരുന്നു. കേസിലെ രണ്ടാം പ്രതിയും അധ്യാപികയുമായ കീർത്തനയ്ക്കും നേരത്തെ ഹൈക്കോടതി ജാമ്യം അനുവദിച്ചിരുന്നു.
ലഹരിക്കേസിൽ വടകര സ്വദേശി പിടിയിലായതോടെയാണ് അധ്യാപകരെ ഇടനിലക്കാരാക്കിയുള്ള ലഹരി ഇടപാടുകൾ സംബന്ധിച്ച അന്വേഷണം പുറത്തുവന്നത്.
കേസിൽ പേരാമ്പ്ര ബി.ആർ.സിയിലെ സ്പെഷ്യൽ എജ്യുക്കേറ്റർ കീർത്തന, ചെരുവാളൂർ സർക്കാർ എൽ.പി. സ്കൂളിലെ ഓട്ടിസം സെന്റർ അധ്യാപിക കാവ്യ, പേരാമ്പ്ര ബി.ആർ.സിയിലെ സ്പെഷ്യൽ എജ്യുക്കേറ്റർ നീഷ്മ, ഇരിട്ടി സ്വദേശി ഓൺലൈൻ ഡെലിവറി ഏജന്റ് ജിജിൽ കുര്യാക്കോസ്, സഫ്വാൻ എന്നിവരാണ് അറസ്റ്റിലായത്.
അറസ്റ്റിന് പിന്നാലെ കാവ്യ, കീർത്തന, നീഷ്മ എന്നിവരെ ജോലിയിൽ നിന്ന് പിരിച്ചുവിട്ടിരുന്നു.
കാവ്യയ്ക്ക് ജാമ്യം ലഭിച്ചതോടെ കേസിലെ തുടർ നിയമനടപടികളിലേക്ക് ശ്രദ്ധ മാറുകയാണ്.
