ചിന്നക്കനാൽ: കാട്ടാന ആക്രമണം രൂക്ഷമായ സാഹചര്യത്തിൽ ഇടുക്കിയിലെ ചിന്നക്കനാൽ മേഖലയിൽ വീണ്ടും മയക്കുവെടി ദൗത്യത്തിന് വനംവകുപ്പ് തയ്യാറെടുക്കുന്നു. ചക്കക്കൊമ്പനെയും മുറിവാലൻ എന്ന ആനയെയും പിടികൂടാനുള്ള നടപടികളാണ് ആരംഭിച്ചത്.
ചിന്നക്കനാൽ, ശാന്തൻപാറ പഞ്ചായത്തുകളിലായി ഒരു മാസത്തിനിടെ കാട്ടാന ആക്രമണത്തിൽ മൂന്ന് പേർ കൊല്ലപ്പെട്ടതോടെയാണ് ആക്രമണകാരികളായ ആനകളെ പിടികൂടി മാറ്റണമെന്ന ആവശ്യം ശക്തമായത്.
പ്രദേശത്ത് ജനങ്ങളുടെ പ്രതിഷേധം ശക്തമായതിനെ തുടർന്നാണ് ആനകളെ പിടികൂടുന്നതിനുള്ള നടപടികൾ സ്വീകരിക്കുമെന്ന് വനംവകുപ്പ് ഉറപ്പ് നൽകിയത്. ദൗത്യത്തിനായുള്ള മുന്നൊരുക്കങ്ങൾ വനംവകുപ്പ് ആരംഭിച്ചിട്ടുണ്ട്.
